Кіраўнікі Беларусі, Расеі і Казахстану гатовыя правесьці ў Менску сустрэчу з прэзыдэнтам Украіны Пятром Парашэнкам для абмеркаваньня актуальных пытаньняў. Пра гэта заявіў сёньня Аляксандар Лукашэнка ў час наведваньня Бярозаўскай ГРЭС.
«Усе гатовыя прыехаць у Менск. Выказаліся нават за тое, каб нейкі іншы бок, дапусьцім, Эўрапейскі Зьвяз, ЗША, калі яны зацікаўленыя ў нармалізацыі сытуацыі — эканамічнай, ваеннай і палітычнай,— давайце сядзем у Менску і пагаворым. Мы нікога не адкідаем. Гэта агульная пазыцыя трох прэзыдэнтаў Эўразійскага эканамічнага саюзу», — сказаў кіраўнік Беларусі.
«Чакаем. Захоча Ўкраіна абмяркоўваць гэтыя пытаньні — сардэчна запрашаем», — адзначыў Аляксандар Лукашэнка.
З ініцыятывай правядзеньня сустрэчы ў Менску лідэраў Беларусі, Казахстану, Расеі і Ўкраіны Аляксандар Лукашэнка выступіў на мінулым тыдні, падчас сустрэчы з кіраўнікамі кампартый Расеі і Ўкраіны. Учора адбыліся тэлефонныя перамовы паміж Аляксандрам Лукашэнкам, Уладзімерам Пуціным і Нурсултанам Назарбаевым, падчас якіх, апроч іншага, абмяркоўвалася і прапановы кіраўніка Беларусі наконт сустрэчы чатырох лідэраў. Пазаўчора Лукашэнка размаўляў па тэлефоне з Парашэнкам.
У прэс-службе прэзыдэнта Ўкраіны Свабодзе заявілі, што ўпершыню чуюць пра такое запрашэньне і паабяцалі пракамэнтаваць гэта пазьней.
