Кірыл Коктыш, палітоляг: «Крэмль зробіць Менску і Астане „мяккую“ прапанову далучыцца да санкцыяў»
Кірыл Коктыш лічыць, што ў Беларусі можа зьявіцца спакуса закупіць, напрыклад, танна яблыкі ў Польшчы, а затым накіраваць іх па даражэйшых цэнах на расейскі рынак.
«Падобная схема з цукрам у свой час была беларускім бокам цалкам адпрацаваная. Але калі ў Маскве ўбачылі, што Беларусь пастаўляе на расейскі рынак цукру болей, чым яго вырабляюць разам усе беларускія заводы, то гэта вылілася ў татальную забарону беларускага экспарту. А даволі працяглыя разборкі завяршыліся дамовай, што Беларусь надалей будзе пастаўляць толькі ўласную, а не замежную прадукцыю.
Прапанова наконт таго, што Беларусі і Казахстану варта было б далучыцца да расейскіх санкцыяў, з боку Масквы будзе, але ў мяккай форме. І калі Менск і Астана не далучацца, то вялікай праблемы для Масквы тут ня будзе. Пагадненьні нават у межах Мытнага саюзу дазваляюць яго сябрам праводзіць дадатковы мытны кантроль. Таму схема паставак прадуктаў з трэціх краін празь Беларусь і Казахстан наўрад ці будзе запушчана».
Міністар Заяц: Павелічэньне паставак харчоў у Расею не адаб’ецца на ўнутраным рынку
Міністар сельскай гаспадаркі і харчаваньня Беларусі Леанід Заяц перакананы, што павелічэньне аб’ёмаў паставак беларускага харчаваньня ў Расею не адаб’ецца на ўнутраным рынку.
«Сытуацыя на ўнутраным рынку мяса-малочнай прадукцыі ў нас стабілізавалася, таму наша задача заключаецца ў тым, каб павышаць канкурэнтаздольнасьць айчыннай прадукцыі, пашыраць яе асартымэнт і прадстаўляць на зьнешніх рынках прадукт высокай спажывецкай якасьці», — заявіў міністар падчас прамой тэлефоннай лініі ў газэце «Белорусская нива».
Міністар адзначыў, што Беларусь упэўненая ў якасьці сваёй прадукцыі. «Гэта натуральны прадукт, бясьпечны, які можа канкураваць па сваіх спажывецкіх якасьцях зь любым эўрапейскім прадуктам», — падкрэсьліў Леанід Заяц.
Фэрмэр Міхаіл Шруб: Вывучым патрабаваньні цывілізаванага рынку
Фэрмэр з Жыткавіцкага раёну Гомельскай вобласьці Міхаіл Шруб кажа, што ягоная гаспадарка і цяпер шмат прадукцыі прадае на расейскі рынак — у Маскву, Санкт-Пецярбург: бульбу, усе віды гародніны, прычым усё мытае, фасаванае. Раней пастаўлялі ў Расею і сьвініну, але цяпер трэба задаволіць перш за ўсё свае патрэбы. Фэрмэр кажа, што пасьля ўступленьня ў Мытны саюз няма ніякіх праблемаў з дакумэнтамі, з афармленьнем паставак. Іншая справа — канкурэнцыя на рынку, гэта рэч «двугострая». Але неабходная, каб людзі нарэшце навучыліся працаваць:
«Нават калі не паглыбляцца ў палітычны аспэкт, гэта дасьць магчымасьць беларусам значна хутчэй і больш маштабна асвойваць расейскі рынак. Раней былі праблемы з пункту гледжаньня канкурэнцыі. Гандлёвыя сеткі працуюць з заходнім пастаўшчыком таму, што ён больш арганізаваны, кваліфікавана займаецца лягістыкай, пастаўляе вялікія партыі тавараў. У нас ёсьць шанец асвоіць і гэтыя кірункі. Толькі ў гэтым выпадку мы можам стаць канкурэнтаздольнымі і заняць пэўны сэгмэнт расейскага рынку. А калі хтосьці хоча скарыстаць момант і „праскочыць“, то рана ці позна яго выжывуць з расейскага рынку.
У нас многія прадпрыемствы наагул ня ведаюць, як прадаваць прадукцыю — маўляў, „мы вырабілі, а вы прыяжджайце, забірайце“. Гэта дасьць магчымасьць вывучыць патрабаваньні цывілізаванага рынку, зразумець, што трэба спажыўцу, і працаваць.
У нас даўно ёсьць і сховішчы, і цэхі перадпродажнай падрыхтоўкі, мы займаемся і мыцьцём, і чысткай, і фасоўкай — усё гэта ў нас ёсьць. Але шмат якія гаспадаркі працуюць па-старому. Магчымасьць выйсьці на расейскі рынак павінна падштурхнуць вытворцаў, навучыць даводзіць сваю прадукцыю да ўзроўню эўрапейскіх пастаўшчыкоў.
У цэлым наша прадукцыя ня горшая за эўрапейскую, але нашы вытворцы часьцяком адстаюць з пункту гледжаньня зьнешняга афармленьня, падачы, фасоўкі, упакоўкі. Але ўсё гэта можна асвоіць».
Валеры Барадзеня, дэпутат камісіі па бюджэце і фінансах Палаты прадстаўнікоў: Мы і цяпер Расею падтрымаем
«На жаль, у нас многія нішы перасякаліся з эўрапейскімі. Возьмем тыя ж яблыкі. Хоць у нас шмат гадоў была дзяржпраграма вытворчасьці яблык, мы пакуль сябе імі не задавальняем...
Мы Расею і раней падтрымлівалі. І, думаю, падтрымаем і цяпер. Канечне, ажыцьцявіць тую забарону, за якую бярэцца Расея, складана. Але калі Расея захоча адэкватна адказаць на эўрапейскія санкцыі, яна зможа гэта зрабіць. Эўропа сапраўды залежыць ад Расеі моцна».
Сьцяпан Сьвідзерскі, інвэстыцыйны аналітык: «Расея зьмяце ўсё зь беларускіх складоў. У нас вырастуць цэны на прадукты, а якасьць іх стане горшая»
«Вельмі моцна ад забароны выйграюць беларускія бізнэсоўцы, заангажаваныя ў шэрыя і чорныя схемы паставак у Расею. Не сакрэт, што польскія тавары, на якія Расея час ад часу накладала розныя гандлёвыя абмежаваньні, увесь час спраўна ішлі на Расею як беларускія тавары ад беларускіх фірмаў. Гэтыя схемы ўжо даўно адпрацаваныя, і шмат прадпрымальнікаў добра зарабляюць на падобных апэрацыях.
Чаго ж чакаць звычайным беларусам? Цяпер, пасьля забароны, можна прадбачыць, што расейскі попыт на паслугі шэрых і чорных прадпрымальнікаў вырасьце ў разы. І можна чакаць, што Расея будзе „вымятаць“ са складоў усе прадукты, якія ёсьць у Беларусі. Што прывядзе да сур’ёзнага росту кошту тавараў у Беларусі і праблемаў з пастаўкамі прадуктаў у беларускія крамы.
Сёньня яшчэ рана драматызаваць сытуацыю — пустыя прылаўкі, чэргі і талёны ня зьявяцца. Але плаціць за прадукты давядзецца больш. Прычым магчымы як адкрыты рост коштаў, так і прыхаваны — праз пагаршэньне якасьці тавару».
Дзьмітры Балкунец, эканаміст: «Думаю, беларускія ўлады разглядаюць варыянты, як пастаўляць на расейскі рынак польскія яблыкі, польскую сьвініну і іншыя тавары з ЭЗ»
«Беларусь ад гэтай забароны, безумоўна, можа выйграць.
Па-першае, праз нарошчваньне паставак прадуктаў харчаваньня ў Расею за кошт унутраных рэзэрваў. Сельская гаспадарка Беларусі ад гэтага толькі выйграе.
Па-другое, Беларусь можа выкарыстоўвацца ў якасьці пляцдарму для рээкспарту замежных тавараў на расейскі рынак. Напрыклад, Казахстан пастаўляе ў Расею некаторыя кітайскія тавары пад выглядам сваіх.
Вядома, Масква можа аказаць ціск і забараніць такія дзеяньні, але, як на маё ўяўленьне, гэта вельмі малаэфэктыўны крок, бо Аляксандар Лукашэнка знойдзе спосаб, як сысьці ад такіх абмежаваньняў.
Я думаю, што цяпер беларускія ўлады разглядаюць варыянты, як пастаўляць на расейскі рынак польскія яблыкі, польскую сьвініну і іншыя тавары з ЭЗ. Тут можна прыгадаць, што калі Расея забараняла пастаўкі грузінскай мінэральнай вады, яна ішла на расейскі рынак зь Беларусі ў межах рээкспарту. Таму тут нельга выключаць, што Беларусь скарыстае такія выгадныя для сябе эканамічныя пэрспэктывы і будзе пастаўляць на расейскі рынак неабходную для Расеі прадукцыю. Гэтаксама як Беларусь скарыстала магчымасьць адкрыць сэрыю казіно, калі ў Расеі такі від дзейнасьці быў забаронены».
Уладзіслаў Цыдзік, намесьнік старшыні камісіі па аграрнай палітыцы Палаты прадстаўнікоў: Ад ножак Буша мяне часам кідала ў жах
«У нас ёсьць рост вытворчасьці сельгаспрадукцыі. І мы забясьпечым дадатковыя пастаўкі ў Расею ў межах магчымага. Будзем іх нарошчваць. І падтрымаем братоў-расейцаў у гэтай сытуацыі.
...Мы адназначна гатовыя сёньня паставіць якаснае мяса птушкі для жыхароў Расеі. Я невыпадкова кажу „якаснае“. Усё сваё працоўнае жыцьцё я займаўся пытаньнямі сельскай гаспадаркі і кантролю. У свой час давялося займацца і „ножкамі Буша“. Ад якасьці гэтай прадукцыі мяне часам кідала ў жах, скажу шчыра. А нашу прадукцыю правяраюць, як кажуць, з усіх бакоў. І расейцы пра гэта ведаюць».
Уладзіслаў Цыдзік ня верыць, што прадукты замежнай вытворчасьці будуць трапляць у Расею празь Беларусь:
«Не, у нас такога ня будзе. Тэарэтычна можна нешта тут хітраваць. Але ж беларусы — людзі не хітраватыя. Мы — людзі, якія ўмеюць жыць і працаваць. Гэта — першае. А другое — апэрацыі рээкспарту недапушчальныя ў нашых узаемадачыненьнях».
Васіль Лявонаў, экс-міністр сельскай гаспадаркі: Адкрыцьцё расейскага рынку выгадна для Беларусі
«Беларусь можа замяніць Польшчу, што да пастаўкі садавіны і ягад, літаральна за два-тры гады. Можна пастаўляць гароднінныя культуры. Калі салата ня можа расьці ў Беларусі, а расьце ў Гішпаніі? Ну, карацей на месяц будзе сэзон. Можна нарошчваць пастаўкі жывёлагадоўчай прадукцыі. Праўда, ня ўсе прадукты могуць канкураваць. Але садавіна, гародніна, ягады могуць. Мяса таксама.
А што да малочнай прадукцыі, то тут яшчэ трэба працаваць. Але ўсё можна зрабіць. А адкрыцьцё рынку — вельмі стагноўчы фактар, які прымусіць Беларусь працаваць над якасьцю прадукцыі»
Аляксандр Караваеў, генэральны дырэктар Інфармацыйна-аналітычнага цэнтра МГУ: Менск і Астана далучацца да расейскіх абмежаваньняў
Менск і Астана могуць далучыцца да расейскіх мераў «у тых гандлёвых пазыцыях, якія не закранаюць іхны рынак...Але яны будуць рабіць гэта вельмі мякка, баючыся, што на іх могуць абрынуцца дзеяньні ў адказ», — такі камэнтар даў Караваеў агенцтву РИА-новости.
Леанід Марыніч, намесьнік міністра сельскай гаспадаркі і харчаваньня Беларусі: Гэтая сытуацыя — кляндайк для Беларусі. У Беларусі ёсьць усё!
Беларускі чыноўнік пракамэнтаваў сытуацыю для расейскага агенцтва РИА-новости:
«Для нас гэта кляндайк. Мы гатовыя замяніць заходнія краіны па многіх пазыцыях у галіне харчаваньня... Заменім галяндзкую бульбу, заменім польскія яблыкі — у нас усё ёсьць».
Беларусь разьлічае, у прыватнасьці, павялічыць у Расею экспарт сыроў, мяса і малака — пішуць РИА-новости