ПАДЗЕІ ДНЯ
Каля Гарадка на Беласточчыне пачынаецца двухдзённы Фэстываль музыкі Маладой Беларусі «Басовішча» (https://www.facebook.com/Basowiszcza). Сёлета фэстываль адбываецца 25-ты раз. Сярод удзельнікаў фэстывалю: Лявон Вольскі, Крама, Гайдамакі, R.U.T.A., Троіца, IQ48, Re1ikt, 5set5, Warsaw Balkan Madness, Abba Orkiestra. Фэстываль, пачынаючы з 1990 году, арганізуе Беларускае аб’яднаньне студэнтаў у Польшчы. Апошнія тры гады за фінансавы разьлік фэстывалю перад спонсарам – урадам Польшчы – адказвае фонд Villa Sokrates, заснаваны пісьменьнікам Сакратам Яновічам.
ГЭТЫ ДЗЕНЬ У ГІСТОРЫІ
64 – у Рыме пачаўся «Вялікі рымскі пажар», які зьнішчыў амаль увесь горад.
1792 – перамога войска Тадэвуша Касьцюшкі над расейскай арміяй Міхаіла Кахоўскага пад Дубенкай.
1925 – першая публікацыя «Mein Kampf» Адольфа Гітлера.
1936 – вайсковы путч Франка ў Гішпаніі, які ператварыўся ў трагічную трохгадовую грамадзянскую вайну.
1968 – лідэр чэскіх камуністаў Аляксандар Дубчак абвясьціў лёзунг «Сацыялізм з чалавечым абліччам».
У гэты дзень нарадзіліся:
1851 – Янка Лучына, беларускі паэт.
Ноч пануе, зор мільёны
Зіхацяць увышыні.
Горад сьціх, даўно усьнёны,
Не гараць яго агні.
У акно глянь, дарагая!
Адгані спрасонак свой!
Бо тут з песьняю чакае
I з каханьнем любы твой.
Глянь, як зорачка міргае,
Вабным бліскае агнём!
Выйдзі! Вусны, дарагая,
Ў пацалунку мы зьліём!
Янка Лучына
1906 – Сяргей Шутаў, беларускі краязнавец.
1909 – Андрэй Грамыка, савецкі палітычны і дзяржаўны дзяяч, дыплямат, міністар замежных справаў СССР і старшыня Прэзыдыюму Вярхоўнага Савету СССР.
1918 – Нэльсан Мандэла, прэзыдэнт ПАР, ляўрэат Нобэлеўскай прэміі міру ў 1993 годзе.
Калі вы размаўляеце з чалавекам на мове, якую ён разумее, вы зьвяртаецеся да ягонага розуму. Калі вы размаўляеце зь ім на ягонай мове, вы зьвяртаецеся да ягонага сэрца.
Нэльсан Мандэла
З КАЛЕНДАРА БАХАРЭВІЧА
Прагноз надвор’я. 18 ліпеня 1936 «над усёй Гішпаніяй бязвоблачнае неба»
