У Данецкай і Луганскай абласьцях аднавілася апэрацыя ўкраінскіх вайскоўцаў супраць узброеных сэпаратыстаў.
У Данецку чутныя выбухі з боку аэрапорту і пасёлку Акцябрскі. Пра гэта агенцтву «Востраў» паведамляюць відавочцы.
Па дадзеных СМІ, якія спасылаліся на запісы ў фэйсбуку, у Данецку сэпаратысты захапілі будынак управы Дзяржаўнай пэнітэнцыярнай службы.
Батальён «Данбас» правёў выведку боем каля вёскі Карлаўка Мар’інскага раёну Данецкай вобласьці. Аб гэтым паведамляецца на старонцы «Данбасу» ў фэйсбуку.
У Луганску чутныя выбухі, стрэлы артылерыйскіх гармат і аўтаматныя чэргі, паведамляе гарадзкі савет. Мэр горада Сяргей Краўчанка просіць жыхароў не выходзіць з дамоў.
Прадстаўнік ураду самаабвешчанай «Луганскай народнай рэспублікі» («ЛНР») Віктар Бабахіньян паведаміў ІТАР-ТАСС, што ў выніку абстрэлу ўкраінскімі сілавікамі аўтавакзала загінуў адзін мірны жыхар, яшчэ чацьвёра былі параненыя.
Як перадае УНП са спасылкай на прэс-цэнтар штабу антытэрарыстычнай апэрацыі, у Луганску сэпаратысты абстрэльваюць з артылерыйскіх сыстэмаў жылыя кварталы ў раёне чыгуначнага вакзалу і аўтавакзалаў.
Апалчэнцы, насупраць, заявілі ІТАР-ТАСС, што абстрэл вядуць украінскія вайскоўцы пры дапамозе ўстановак «Град». У нядзелю міністар абароны Украіны Валеры Гелетэй і начальнік Генштабу Віктар Мужэнка даклалі прэзыдэнту Пятру Парашэнка, што ўкраінскі дзяржаўны сьцяг узьняты над Арцёмаўскам і Дружкоўкай Данецкай вобласьці.
Зь пятніцы вечара вайскоўцы таксама занялі Славянск і Краматорск.
Раней у нядзелю прэзыдэнт Украіны Пятро Парашэнка заявіў, што ўвядзеньне аднабаковага замірэньня на ўсходзе краіны не прадбачыцца. Пра гэта паведаміў журналістам прадстаўнік Рады нацыянальнай бясьпекі і абароны Ўкраіны Андрэй Лысенка. Ён таксама падкрэсьліў, што ў апэрацыі ў Данецку і Луганску ня будзе ўжывацца авіяцыя.
Кроніка апошніх падзеяў у фотаздымках:
