У Івацэвічах на Берасьцейшчыне народныя гуляньні праходзяць на плошчы Леніна і каля лядовай арэны. Раніцай прадстаўнікі мясцовай улады ды вэтэраны ўсклалі тут кветкі ахвярам вайны. Пазьней пачаўся канцэрт, а майстры народнай творчасьці і мясцовыя прадпрыемствы выставілі свае вырабы. За райвыканкамам усталявалі сталы, дзе можна папіць квасу ды паесьці шашлыку.
У першай палове дня нецьвярозых не відаць, але і ў цэлым людзей няшмат. Шырэйшыя гуляньні будуць у другой палове дня каля лядовай арэны, дзе анансавалі канцэрт «зоркі беларускай эстрады» Жанэт. Тамсама, каля лядовай арэны, увечары зладзяць фаер-шоў, а блізу 23-й гадзіны адбудзецца і традыцыйны салют.
Георгіеўскіх стужак у Івацэвічах зусім не заўважна. Зрэдку трапляюцца людзі з пачэпленымі чырвона-зялёнымі стужкамі, дзеці бавяцца чырвона-зялёнымі сьцяжкамі.