ПАДЗЕІ ДНЯ
Менск. У кнігарні «Галіяфы» – прэзэнтацыя кнігі Аляксандра Лукашука «Вяртаньне нацыяналіста». Пачатак а 19-й гадзіне.
Менск. У паб-клюбе «Графіці» – музычная прэзэнтацыя Анталёгіі перакладу расейскай рок-паэзіі ў часопісе «Дзеяслоў». Пачатак а 19-й гадзіне.
Менск. У офісе партыі БНФ – прэс-канфэрэнцыя грамадзкай кампаніі «За якасную мэдыцыну для ўсіх!». Пачатак аб 11 гадзіне.
Менск. Адкрываецца IV праваслаўна-каталіцкая канфэрэнцыя хрысьціянскіх Цэркваў Эўропы. У канфэрэнцыі бяруць удзел прадстаўнікі 14 краін сьвету.
ТАКСАМА Ў ГЭТЫ ДЗЕНЬ
1912 – на хутары Акопы на Лагойшчыне Янка Купала паставіў апошнюю кропку ў сваёй славутай камэдыі «Паўлінка». Вось тэкст адной зь песень галоўнай гераіні Паўлінкі:
Ой, ляцелі гусі дый з-пад Беларусі,
Селі яны, палі на сівым Дунаі!
Селі яны, палі, ваду замуцілі
Дый нас, маладзенькіх, з сабой разлучылі.
Бадай тыя гусі марне запрапалі,
Як мы любіліся – цяпер перасталі.
2006 – Чарнагорыя абвясьціла незалежнасьць ад Сэрбіі.
У гэты дзень нарадзіліся:
1864 – Рэнсіт Элі Олдсом. Амэрыканскі вынаходнік і аўтавытворца, які стварыў першы камэрцыйна пасьпяховы амэрыканскі аўтамабіль «Олдсмабіль».
1911 – Ганна Сапрыка, беларуская пісьменьніца, перакладчыца. Сярод яе творчых здабыткаў – кніга перакладаў «Апавяданьні кітайскіх пісьменьнікаў" (1953).
1935 – Васіль Зуёнак, беларускі паэт, які доўгі час працаваў сакратаром Саюзу пісьменьнікаў Беларусі і спрыяў маладым літаратарам патрыятычнай скіраванасьці. У адным зь вершаў Зуёнак пісаў:
Мама «Ойча наш...» прамаўляла
I вучыла ксьціцца мяне, –
Больш малітваў мама ня знала, –
З той, адной, быць і мне ў труне.
ЁСЬЦЬ НАГОДА
У Беларусі традыцыйна ўшаноўваецца Алена. «Да сьвятой Алены гароды зялены», – казалі нашыя продкі. І яшчэ: «Сей лён на Алену – будзе кашуля да калена». Сеялі абавязкова ў чыстай вопратцы, каб лён быў чысты.
З КАЛЕНДАРА БАХАРЭВІЧА
Слова-сьмерць, слова-жах. 3 чэрвеня 1988 у ЛіМе выходзіць артыкул «Курапаты ― дарога сьмерці».
