Лінкі ўнівэрсальнага доступу

Гомель: крымінал у крымінальнай міліцыі


У Гомелі за хабар арыштаваны намесьнік начальніка абласной крымінальнай міліцыі палкоўнік Вячаслаў Іваненка. А былы начальнік крымінальнага вышуку Мікалай Лосеў, таксама палкоўнік, сядзіць у турме, бо быў зьвязаны з крымінальнай бандай.

Палкоўніка Іваненку, намесьніка начальніка крымінальнай міліцыі па апэратыўнай працы, затрымалі супрацоўнікі КДБ на вуліцы. Яго вінавацяць у атрыманьні хабару ў памеры 4 тысяч даляраў ЗША.

Фармулёўка скупая і даволі стандартная: за спрыяльнае вырашэньне пытаньняў, якія ўваходзяць у яго кампэтэнцыю.

Пракуратура распачала ў дачыненьні да Вячаслава Іваненкі крымінальную справу паводле часткі 2 артыкула 430 Крымінальнага кодэксу. А гэта ня проста хабар. Частка другая згаданага артыкула прадугледжвае ня толькі буйны памер хабару, але й паўторнае яго атрыманьне, незаконныя дзеяньні (бязьдзеяньні) альбо нават вымагальніцтва ці папярэднюю змову групы асобаў. І пакараньне ў гэтым выпадку таксама больш жорсткае — ад 5 да 10 гадоў зьняволеньня з канфіскацыяй маёмасьці і пазбаўленьнем права займацца пэўнай дзейнасьцю.

Дасьведчаны ў справах працы праваахоўных органаў гамяльчук лічыць: старшых міліцэйскіх афіцэраў такія жорсткія санкцыі не палохаюць з тае прычыны, што ў міліцэйскіх шыхтах ідзе дэградацыя:

«У органах міліцыі адбываецца дэпрафэсіяналізм і дэградацыя. Тыя людзі, які прыйшлі ў органы гадоў дваццаць таму і бачаць беспэрспэктыўнасьць службы, пачынаюць думаць пра сваё цёплае месца пасьля раньняга выхаду на пэнсію. А дзеля гэтага патрэбны нейкі „залаты запас“. І што палкоўнікі бяруць хабар — гэта найперш з-за адсутнасьці пэрспэктыў у жыцьці пасьля службы. Страшна выходзіць „на свабоду“. Як зэку з „зоны“, так і міліцыянту зь цёплага месца, дзе ён у атачэньні формы, зброі, дубінак, машын ды іншых атрыбутаў улады».

Да таго ж, як лічыць суразмоўца, у міліцэйскіх чыноў ёсьць прыклад для перайманьня:

«У гэтых палкоўнікаў ёсьць, канечне, добры прыклад — прадстаўнікі ўлады: кіраўнікі адміністрацыяў, мэры гарадоў і гэтак далей. Калі начальства бярэ, то чаму я не магу ўзяць? Я ж таксама хачу, у мяне, можа, яшчэ цяплейшае месьцейка, у мяне яшчэ большае прыкрыцьцё, тым больш калі я апэратыўны супрацоўнік, можна сказаць, сакрэтны супрацоўнік. Таму хабар — вялікая спакуса».
Тыя людзі, які прыйшлі ў органы гадоў дваццаць таму і бачаць беспэрспэктыўнасьць службы, пачынаюць думаць пра сваё цёплае месца пасьля раньняга выхаду на пэнсію


Да пераходу ў абласную ўправу міліцыі Вячаслаў Іваненка служыў у Чыгуначным райаддзеле міліцыі — адным з самых буйных у абласным цэнтры. У верасьні 2008 году ўказам прэзыдэнта яму было прысвоена званьне палкоўніка міліцыі.

Былы афіцэр міліцыі Ўладзімер зьвяртае ўвагу на тое, якім парадкам міліцыянтаў цяпер прасоўваюць па службовай лесьвіцы:

«Высокія пасады, званьні атрымліваюць часьцяком не за свае дзелавыя і маральныя якасьці, а хутчэй праз тое, як дагодзяць уладзе і вышэйшаму начальніку. А прыйшоўшы такім чынам на пасаду, ён, пэўна ж, думае, што калі ў яго ёсьць „дах“, то яму ўсё дазволена. Дзесьці каго адмазаў, каго прыкрыў, каго адпусьціў — процьма варыянтаў».

Гомельскаму крымінальнаму вышуку наагул не шанцуе на кадры. Былы начальнік крымінальнага вышуку Мікалай Лосеў, таксама палкоўнік, адначасова быў на службе і забесьпячэньні ў злачыннай банды Сяргея Марозава. Міліцэйскі палкоўнік браў удзел у вымаганьні грошай ад прадпрымальнікаў, забясьпечваў крымінальнікаў інфармацыяй, у тым ліку і наконт пошуку забітага імі ж міліцыянта. За гэта ў 2006 годзе суд пакараў Лосева 18 гадамі турэмнага зьняволеньня. Ягоны падначалены апэратыўны супрацоўнік Шляпін быў асуджаны на 11 гадоў.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG