ПАДЗЕІ ДНЯ
«Мова ці кава: ровары, скейты, паркур, ролікі і ўвогуле, гарадзкі экстрым!» Заняткі пачнуцца а 19:00 у Крэатыўнай прасторы «ЦЭХ» (Менск, прасп. Незалежнасьці, 58, к. 6). Вядуць заняткі Кацярына Пікірэня і Франак Вячорка.
Лекцыю «Каляндарная аснова традыцыйнай культуры: веснавы Новы год» ў этнакраме «Рагна» (Менск, вул. Сухая, 4) прачытае кандыдат філязофскіх навукаў Сяргей Санько. Пачатак а 18:30.
У Сямяцічах (Падляскае ваяводзтва, Польшча), у парафіяльнай залі пры царкве Сьвятых Пятра і Паўла, адбудзецца прэзэнтацыя найноўшай кніжкі Дарафея Фіёніка, гісторыка, этнографа і натхняльніка культурнага жыцьця беларускай нацыянальнай меншасьці на Падляшшы, пад загалоўкам «Міеста в гісторыjі і кул’туры пудл’ашскіх біелорусув» (Гарады ў гісторыі і культуры падляскіх беларусаў). Кніжка напісаная на падляскай гаворцы. Пачатак прэзэнтацыі а 18.00.
ГЭТЫ ДЗЕНЬ У ГІСТОРЫІ
1889 — афіцыйнае адкрыцьцё Эйфэлевай вежы.
1980 — уручэньне Леаніду Ільлічу Брэжневу Ленінскай прэміі па літаратуры за нібыта напісаныя ім кнігі ўспамінаў «Малая зямля» і «Адраджэньне».
1991 — на рэфэрэндуме ў Грузіі 90% насельніцтва прагаласавала за незалежнасьць.
1999 — выйшаў у сьвет адзін з найбольш вядомых навукова-фантастычных фільмаў — «Матрыца».
У гэты дзень нарадзіліся:
1926 — Джон Фаўлз, ангельскі раманіст.
1949 — Зьміцер Санько, беларускі біёляг, адзін з заснавальнікаў Таварыства беларускай мовы імя Францішка Скарыны.
1962 — Міхал Вівэг, чэскі пісьменьнік.
У гэты дзень памерлі:
1727 — Ісак Ньютан, ангельскі фізык, матэматык і астраном, аўтар фундамэнтальнай працы «Матэматычныя пачаткі натуральнай філязофіі», у якой апісаў закон сусьветнага прыцягненьня і так званыя Законы Ньютана, якія заклалі асновы клясычнай мэханікі.
1969 — Мікола Шчаглоў-Куліковіч, беларускі кампазытар і музыколяг, дзяяч беларускага руху ў эміграцыі. На лібрэта Натальлі Арсеньневай напісаў дзьве опэры: лірычна-рамантычную «Лясное возера» і гістарычную «Усяслаў Чарадзей».
ЦЫТАТА НА ПАМЯЦЬ:
«Распавядаць пра тое, што зьбіраесься зрабіць — усё роўна, што выхваляцца карцінамі, якіх ты яшчэ не напісаў. Гэта ня проста благі тон, гэта абсалютная страта твару».
Джон Фаўлз