Лінкі ўнівэрсальнага доступу

Жудасны час у крымскім палоне


Андрэй Шчакун

У чацьвер стала вядома, што самаабвешчаная крымская ўлада пасьля ультыматуму афіцыйнага Кіева вызываліла восем закладнікаў, сярод якіх быў і старшыня Ўсякрымскай Украінскай Рады, каардынатар крымскага Эўрамайдану Андрэй Шчакун.

Андрэй зьнік яшчэ раніцай 10 сакавіка. Разам са старшынёй Апякунскай рады Ўкраінскай школы—гімназіі ў Сымфэропалі Анатолем Кавальскім украінскага актывіста скралі на сімфэропальскім чыгуначным вакзале прадстаўнікі «самаабароны Аксёнава».

Андрэй Шчакун яшчэ знаходзіцца ў Херсонскай бальніцы, але ўжо зьбіраецца ў Кіеў, дзе яго чакае жонка. Пра самаадчуваньне ў інтэрвію ўкраінскай службе нашага радыё Андрэй кажа:

— Трохі ёсьць слабасьць. Толькі зрабілі апэрацыю, дасталі з рукі дзьве кулі — «Самаабаронцы» стралялі ў мяне з «траўмата». Рады, што ва Ўкраіне, што ўжо вольны, трымаюся. Толькі крыўдна за Крым, які так здалі.

—Ужо размаўляў з роднымі?

— Так, як толькі апынуліся на Чангары, адразу патэлефанаваў жонцы. Людміла адвезла трох нашых дзяцей на Львоўшчыну і цяпер чакае мяне ў Кіеве.

— Андрэй, ведаю, што цяжка было...

— Перажыў жудасныя часы, ня дай Бог такое камусьці такое перажыць. Зьбівалі, катавалі, электрычнасьць падключалі, лупілі па сьпіне. Распытвалі, ці зьвязаны з «Правым сэктарам», хто фінансуе, хто кіруе... У прынцыпе ўсё вытрымаў, сілы волі хапіла. Акрамя таго, зьдзекаваліся некаторыя ахоўнікі, стралялі ў рукі і ногі з пнэўматычнай зброі. Не давалі есьці, часам і піць. Было вельмі, вельмі цяжка. Але і былі людзі, якім яшчэ горш даставалася. Іх прывозілі амаль кожную ноч, кожную раніцу. Аднаму з хлопцаў вуха адрэзалі. А ён наогул ні да чаго ня мае дачыненьня, хоць і прынялі яго за «Правы сэктар». Прастрэлілі яму абедзьве нагі. Зь іншага хлопца яшчэ больш зьдзекаваліся, таму што даведаліся па фатаграфіі ў інтэрнэце, што быў у Кіеве, на Майдане. Я, дзякуючы пэўнаму вопыту, быў асьцярожны ў адказах, трымаўся неяк маральна, можа, і таму ня так пацярпеў, як гэтыя хлопцы.

— Хто былі гэтыя людзі, якія вас трымалі?

— Там кантынгент быў падабраны асаблівы, у іх у галовах сапраўдная інфармацыйная вайна, поўнае глупства. Былі там розныя людзі: адны крыжыкі нацельныя сарвалі, іншыя іх купілі і прынесьлі нам, калі пра гэта даведаліся. А былі так званыя «спэцыялісты», да якіх нас вадзілі нас на допыт. Гэта стоадсоткава не крымчане, яны неяк па—іншаму і размаўлялі, і дзейнічалі, відаць, прафэсійна. Печань абяцалі выразаць, іншыя падобныя жудасныя рэчы казалі. Падобна на тое, што гэта былі чачэнцы. А ўсе астатнія, ахоўнікі — былыя вайскоўцы, якія адслужылі арміі, на Чарнаморскім флёце. Падобна на тое, што гэта былі крымчане, яны сябе называлі «армія Крыма».
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG