Лінкі ўнівэрсальнага доступу

НАТО: Расея працягвае парушаць сувэрэнітэт Украіны


Расея, не зважаючы на неаднаразовыя заклікі міжнароднай супольнасьці, працягвае парушаць сувэрэнітэт і тэрытарыяльную цэласнасьць Украіны, а таксама свае міжнародныя абавязальніцтвы, заявіла ўчора Паўночнаатлянтычная рада НАТО.

Дзеяньні Расеі ствараюць сур’ёзныя наступствы для бясьпекі і стабільнасьці эўраатлянтычнага рэгіёну, заявіў кіраўнічы орган Паўночнаатлянтычнага зьвязу пасьля тэрміновых кансультацый, які склікала Польшча з-за дзеяньняў Расеі ў суседняй зь ёй Украіне.

НАТО узмоцніць дэталёвае вывучэньне наступстваў цяперашняга крызысу для бясьпекі альянсу, гаворыцца ў заяве.

НАТО будзе і далей падтрымліваць усе канструктыўныя намаганьні, якія накіраваныя на мірнае вырашэньне крызысу адпаведна зь міжнародным правам.
«Мы вітаем такія намаганьні ААН, Эўразьвязу, АБСЭ і Рады Эўропы», — заявілі амбасадары краін НАТО.

Паўночнаатлянтычны зьвяз таксама будзе далей кансультавацца з нагоды гэтага крызысу з Украінай у рамках Камісіі НАТО — Украіна. Таксама зьвяз будзе весьці размовы пра гэта і з Расеяй у рамках Рады НАТО — Расея, якая правядзе сустрэчу ўжо сёньня.

Тэрміновую кансультацыю склікалі на запыт Польшчы, якая папрасіла пра яе, паводле артыкула 4 Вашынгтонскай дамовы пра функцыянаваньне НАТО. Гэты артыкул прадугледжвае права краін-чальцоў пасьці на такі крок, калі яны лічаць, што ўзьнікае небясьпека іх тэрытарыяльнай цэласнасьці, палітычнай незалежнасьці ці бясьпецы.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG