Менскае мэтро не працавала ў гадзіну «пік» — шукалі «невядомыя прадметы»
Амаль дзьве гадзіны надвячоркам 26 лютага ў мэтро шукалі невядомыя прадметы, а людзі былі вымушаны карыстацца наземным транспартам або ісьці пешшу. Пад 18-ю гадзіну дзьверы падземкі зноў адчынілася, але ўсіх пасажыраў на ўваходзе надглядаюць.
17:40 Менскае мэтро аднаўляе працу.
Супрацоўнікі праваахоўных органаў запускаюць пасажыраў на станцыі, аднак праводзяць працэдуру стараннага надгляду.
Менская міліцыя абяцае неўзабаве выступіць з аіфцыйным тлумачэньнем сытуацыі.
17:30 У сацыяльных сетках зьяўляюцца паведамленьні, што на розных станцыях мэтро працуюць сапёрныя групы.
16:00 На маршруты грамадзкага транспарту па лініі мэтро дадаткова вывелі 55 аўтобусаў, 48 тралейбусаў, 6 трамваяў, 100-ты маршрут аўтобуса падоўжаны да Ўручча, паведамляе БЕЛТА з спасылкай на прэсавую службу Менгарвыканкаму.
Чарга на прыпынку грамадзкага транспарту
Паведамленьне пра тое, што мэтро не працуе
15:06 Наш карэспандэнт паведаміў, што адбываецца эвакуацыя людзей са станцыі мэтро Кастрычніцкая.
Прэс-сакратар упраўленьня МНС па Менску Віталь Дэмбоўскі паведаміў, што на нумар 101 паведамленьянў пра здарэньні ў мэтро не паступала.
Паведамляецца, што на станцыях шмат супрацоўнікоў міліцыі, уваходы перакрытыя.
Прэс-сакратар ГУУС Менгарвыканкаму Аляксандр Ластоўскі: «Паступіла інфармацыя, што на некаторых станцыях мэтро могуць знаходзіцца неапазнаныя прадметы. Для таго, каб максымальна хутка, апэратыўна і дакладна праверыць гэтую інфармацыю, было прынята рашэньне спыніць працу станцый мэтрапалітэна, забясьпечыўшы іх працу толькі на выхад пасажыраў. Зараз адбываюцца апэратыўныя мерапрыемствы. Спадзяемся, што праца мэтрапалітэна хутка ўзновіцца».
