Лінкі ўнівэрсальнага доступу

Для турмы на Акрэсьціна людзі хочуць купіць тэлевізары


Архіўнае фота. 22 сьнежня 2010 году.
Грамадзкія актывісты гатовыя набыць тэлевізары для вязьняў турмы на вуліцы Акрэсьціна ў Менску.

Грамадзкі актывіст Аляксандар Вялітчанка накіраваў начальніку менскай турмы на Акрэсьціна зварот, у якім прапануе дапамогу ў забесьпячэньні тэлевізарамі, якія будуць набытыя на сабраныя ад грамадзян сродкі.

«Праваабаронцы супраць катаваньняў» адзначаюць, што ўмовы побыту затрыманых у ізалятарах часовага ўтрыманьня выклікаюць жах.

У камэрах антысанітарыя, адсутнічае мэбля, дрэннае асьвятленьне і іншыя парушэньні, якія ператвараюць адбыцьцё пакараньня ў сапраўднае катаваньне
«У камэрах антысанітарыя, адсутнічае мэбля, дрэннае асьвятленьне і іншыя парушэньні, якія ператвараюць адбыцьцё пакараньня ў сапраўднае катаваньне. Былыя адміністрацыйна арыштаваныя не перастаюць пісаць скаргі на ўмовы ўтрыманьня, бо час, праведзены ў такіх умовах, немагчыма ўзгадваць без агіды».

З восені 2012 году Цэнтар ізаляцыі правапарушальнікаў Галоўнага ўпраўленьня ўнутраных спраў Менскага гарвыканкаму (турма на Акрэсьціна) зачынены на капітальны рамонт.

У адпаведнасьці з правіламі ўнутранага распарадку камэры спэцустаноў абсталёўваюцца:

— сталом і лавамі з колькасьцю пасадачных месцаў паводле колькасьці месцаў у камэры;

— санітарным вузлом;

— рукамыйніцай (па магчымасьці), а таксама кранам з водаправоднай вадой (бачком зь пітной вадой);

— тумбачкай для захоўваньня туалетных прыладаў;

— сеткавым радыёпрымачом;

— урнай для сьмецьця;

— вэнтыляцыйным абсталяваньнем;

— тэлевізарам (пры магчымасьці).

Мы лічым, што наяўнасьць тэлевізараў у камэрах будзе станоўча ўплываць на ўмовы ўтрыманьня адміністрацыйна арыштаваных
Беларускія грамадзяне гатовыя добраахвотна дапамагчы дзяржаве і ЦІП, каб умовы ўтрыманьня адпавядалі заканадаўству, патлумачыў актывіст Аляксандар Вялітчанка:

«Мы лічым, што наяўнасьць тэлевізараў у камэрах будзе станоўча ўплываць на ўмовы ўтрыманьня адміністрацыйна арыштаваных і адміністрацыйна затрыманых асоб, будзе ствараць больш гуманныя ўмовы ўтрыманьня затрыманых, якія адпавядаюць міжнародным стандартам, а таксама спрыяць найбольш поўнай адпаведнасьці дзейнаму заканадаўству».
XS
SM
MD
LG