ФОТАГАЛЕРЭЯ: Разьвітаньне зь Міхаілам Жызьнеўскім у Кіеве
Жызьнеўскага пахаваюць у аўторак пад Гомелем
Пра гэта Радыё Свабода паведаміла маці забітага ў Кіеве актывіста Ніна Васільеўна
Пахаваньне Міхаіла Жызнеўскага адбудзецца ў аўторак 28-га студзеня ў пасёлку «Сьцяг Працы» пад Гомелем. Больш дакладны час пахаваньня будзе паведамлены пазьней. Гэта будзе прыкладна 12.00-13.00.
Месца пахаваньня вызначана самастойнай воляй бацькоў. Інфармацыя пра тое, што на бацькоў аказваўся ціск з боку спэцслужбаў, не адпавядае рэчаіснасьці.
Сёньня на разьвітаньні з забітым на кіеўскіх барыкадах беларусам Міхаілам Жызьнеўскім былі ягоныя сястра і пляменьнік. Бацькі прыехаць не змаглі. Сяброўка Міхаіла Жызьнеўскага зь Белай Цэрквы Саша Панчанка распавяла Свабодзе, што сёньня ў Кіеве на разьвітаньні былі сястра Міхаіла Натальля і пляменьнік Павал.
З блізкіх сяброў была Саша Панчанка з мужам:
«Было занадта многа людзей і занадта многа журналістаў», — кажа Саша Панчанка.
Сяброўка Жызьнеўскага Саша Панчанка сказала Свабодзе, што ня хоча каб на пахаваньні Міхаіла ў Беларусі былі журналісты:
«Не, не і яшчэ раз не. Я еду туды, каб пахаваць яго як чалавека».
