Лінкі ўнівэрсальнага доступу

Кітайцы завалодалі 120 гектарамі беларускай зямлі. На 100 гадоў


Мясьціны, дзе разьмесьціцца кітайскі індустрыяльны парк

Беспрэцэдэнтныя льготы прадугледжаныя ўказам Аляксандра Лукашэнкі для кампаній, якія будуць задзейнічаныя ў будаўніцтве заводу па вытворчасьці легкавых аўтамабіляў кітайскай маркі Geely ў Барысаўскім раёне.

Гэтак, пры падрыхтоўцы праекту дзяржаўнай інвэстыцыйнай праграмы на 2014 год ураду даручана прадугледзець сродкі на фінансаваньне працаў на праектаваньне і будаўніцтва інжынэрнай і транспартнай інфрастуктуры. У сваю чаргу, Менскі аблвыканкам мусіць перадаць закрытаму акцыянэрнаму таварыству «БелДжы» ў арэнду на 99 гадоў зямельны надзел памерам амаль 120 гектараў у межах свабоднай эканамічнай зоны «Менск» для эксплюатацыі аб’ектаў прадпрыемства.

Згодна з указам, завод па вытворчасьці легкавых аўтамабіляў павінен быць збудаваны да 1 ліпеня 2019 году. Удакладняецца, што інвэстпраект рэалізуецца ў адпаведнасьці з мэмарандумам аб разьвіцьці супрацоўніцтва, падпісаным Міністэрствам прамысловасьці і кітайскай карпарацыяй «Джылі». Вызначаны заказчык у праектаваньні й будаўніцтве — сумеснае беларуска-кітайскае прадпрыемства «БелДжы», зарэгістраванае на тэрыторыі СЭЗ «Менск». Яго заснавальнікі — прадпрыемства БелАЗ, карпарацыя «Джылі» і арганізацыя «Саюзаўтатэхналёгіі». Выніковая прадукцыя — легкавыя аўтамабілі маркі Geely.

Гаворыцца, што рэалізацыя ўказу дазволіць прыцягнуць інвэстыцыі ў стварэньне прадпрыемства магутнасьцю 120 тысяч аўтамабіляў на год. Пры гэтым 90% «канкурэнтаздольнай» прадукцыі плянуецца экспартаваць. Агульны кошт беларуска-кітайскага праекту ацэньваецца ў 650 мільёнаў даляраў, усе грошы — кітайскія.

Пры тым, што стаўленьне беларускіх спажыўцоў да кітайскіх аўто насьцярожанае, сам Аляксандар Лукашэнка перакананы: гэта якраз тое, што трэба беларускаму народу. Два дні таму, прымаючы прэм’ер-міністра Міхаіла Мясьніковіча й кіраўніка Менскай вобюласьці Сямёна Шапіру, Лукашэнка заявіў, што вытворчасьць «айчыннага легкавога аўтамабіля» трэба паставіць у адзін шэраг з будаўніцтвам АЭС і рэалізацыяй праектаў у космасе:

«Тое, пра што марылі многія беларусы і, перш за ўсё, я — ажыцьцявілася. Беларускі аўтамабіль мы вырабілі разам з нашымі кітайскімі сябрамі і, паводле маіх дадзеных, прыкладна 2,5 тысячы прадалі ў мінулым годзе. Попыт на падобны тып аўто ёсьць ня толькі ў Беларусі, але і за межамі нашай краіны».

З вырабленых за мінулы год 2,5 тысяч ці то беларускіх, ці то кітайскіх аўто ўдалося прадаць крыху больш за 1,5 тысячы. Абсалютная большасьць ад’ехала ў Казахстан, па некалькі сотняў разышліся ў Расеі і Беларусі. Астатнія ў чаканьні абяцанага ажыятажу пакуль стаяць на складзе.

Тым часам аўтамабільныя экспэрты перакананыя, што беларусы не захочуць у масавым парадку перасядаць на Geely: кошт базавай мадэлі ў стандартнай камплектацыі стартуе ад 15 тысяч даляраў, а за такія грошы можна набыць 3-5-гадовы экзэмпляр ад усясьветна вядомых вытворцаў.

Ваша меркаваньне

Паказаць камэнтары

XS
SM
MD
LG