Лінкі ўнівэрсальнага доступу

Пачобут, Яроменак, Новікава і Свабодны тэатар — ляўрэаты прэміі імя Івашкевіча


Беларускі свабодны тэатар
Беларускі свабодны тэатар
Сайт charter97.org аб’явіў ляўрэатаў Нацыянальнай прэміі ў галіне абароны правоў чалавека за 2013.

Хартыя’97 вырашыла прысьвяціць Нацыянальную прэмію за абарону правоў чалавека памяці аднаго зь лідэраў беларускага адраджэньня Віктара Івашкевіча. Віктар Івашкевіч быў адным з ініцыятараў і сябрам аргкамітэту грамадзянскай ініцыятывы «Хартыя’97».

Сёлетнімі ляўрэатамі прэміі сталі Андрэй Пачобут, Уладзімір Яроменак, Беларускі Свабодны тэатар і Тацяна Новікава

Андрэй Пачобут
Андрэй Пачобут
У абгрунтаваньні ўзнагароды для Андрэя Пачобута гаворыцца:

«Ляўрэат прэміі «За асабістую мужнасьць». Журналіст, верны прафэсіі, а таксама адзін зь лідэраў перасьледаванага беларускімі ўладамі Саюзу палякаў Беларусі. Нягледзячы на ціск, крымінальныя справы і турмы ён называе рэчы сваімі імёнамі, піша артыкулы, адкрыта крытыкуе ўлады, не замоўчвае тое, пра што трэба крычаць на ўвесь сьвет.

Уладзь Яроменак
Уладзь Яроменак
Паводле арганізатараў прэміі, «лёс Уладзіміра Яроменка — страшная тэндэнцыя сёньняшняга часу. У турмах па-ранейшаму працягваюць утрымлівацца палітвязьні , арыштаваныя падчас і пасьля выбарчай кампаніі 2010 года, аднак тыя вязьні сумленьня, якія выходзяць на волю, арыштоўваюцца па другім коле. Кожны з былых палітвязьняў знаходзіцца пад татальным кантролем уладаў.

Беларускі Свабодны тэатар атрымлівае прэмію "За сьмеласьць у творчасьці". Паводле арганізатараў, кожны спэктакаль тэатру ў Менску спалучаны зь вялікай рызыкай. Супрацоўнікі міліцыі і спэцслужбаў урываюцца практычна на кожную пастаноўку, затрымліваючы і актораў і гледачоў. У гэтым годзе тэатар застаўся без памяшканьня. Улады забаранілі трупе ставіць спэктаклі нават у прыватным доме ў адным з раёнаў Менску. Але сьмелыя артысты, рызыкуючы свабодай, працягваюць граць спэктаклі на розных пляцоўках, а таксама праводзяць пэрфомансы на вуліцах сталіцы».

Тацяна Новікава
Тацяна Новікава
Эколяг Тацяна Новікава разам з калегамі пасьлядоўна змагаецца супраць будаўніцтва ў Беларусі атамнай электрастанцыі.

«Пратэстуючы супраць шматлікіх парушэньняў пры ўзьвядзеньні АЭС, экаабаронцы сёньня выйшлі на перадавую і падпадаюць пад рэпрэсіі разам з палітычнай апазыцыяй. За сваю дзейнасьць Тацяна Новікава падпадала пад арышт і ціск. Сёньня яна змагаецца за тое, каб беларусы мелі праўдзівую інфармацыю аб экалягічна небясьпечных праектах улады і маглі ўплываць на прыняцьце важных для краіны рашэньняў»

Нацыянальная прэмія за абарону правоў чалавека была заснаваная Хартыяй’97 у 1998 годзе. У розныя гады ляўрэатамі прэміі станавіліся абаронцы намётавага мястэчка на Кастрычніцкай плошчы Менска ў сакавіку 2006 года, палітвязьні Алесь Бяляцкі , Аляксандар Казулін, Зьміцер Дашкевіч, Міхаіл Марыніч, Павел Севярынец, Мікалай Статкевіч, Андрэй Кім, Сяргей Парсюкевіч, першы кіраўнік незалежнай Беларусі Станіслаў Шушкевіч, актывістка Беларускага незалежнага прафсаюзу Алена Захожая, вернікі, якія ўдзельнічалі ў галадоўцы ў абарону храма пратэстанцкай царквы, старшыня камітэту парафіі сьвятога Язэпа ў г. Менску Івона Мацукевіч, праваабаронцы Валер Шчукін і Галіна Юбко, жонкі зьніклых у Беларусі лідэраў апазыцыі, Народная артыстка Беларусі Зінаіда Бандарэнка, актывіст апазыцыі Уладзімір Плешчанка, абаронцы Курапатаў, творчае аб’яднаньне «Пагоня», музычныя гурты «Ляпіс Трубяцкі» і яе лідэр Сяргей Міхалок, NRM, Новае неба, закрыты ўладамі Беларускі гуманітарны ліцэй імя Якуба Коласа, журналісты Павал Мажэйка, Мікола Маркевіч, Віктар Івашкевіч, Любоў Лунёва ды іншыя вядомыя грамадзкія дзеячы, палітыкі, журналісты.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG