Лінкі ўнівэрсальнага доступу

Знайшлі падазраванага ў сьмерці Ігара Пцічкіна ў менскім СІЗА


Ім стаў турэмны лекар.

Крымінальную справу аб сьмерці ў сьледчым ізалятары №1 гораду Менску асуджанага Ігара Пцічкіна будзе расьсьледаваць Сьледчы камітэт Беларусі.

«Галоўнае сьледчае ўпраўленьне СК прыняло да сваёй вытворчасьці крымінальную справу ў дачыненьні да супрацоўніка мэдыцынскай часткі СІЗА-1 упраўленьня дэпартамэнту выкананьня пакараньняў МУС па Менску і Менскай вобласьці, які падазраецца ў неналежным выкананьні прафэсійных абавязкаў, што пацягнула па неасьцярожнасьці сьмерць асуджанага Ігара Пцічкіна, і працягвае расьсьледаваньне»,— паведаміла «Інтэрфаксу» афіцыйны прадстаўнік аддзелу інфармацыі і сувязі з грамадзкасьцю Сьледчага камітэту Беларусі Юлія Ганчарова.

Яна праінфармавала , што «ў сувязі з прызначэньнем паўторнай судова-мэдыцынскай экспэртызы, сьледзтвам праведзеная эксгумацыя цела памерлага зь месца пахаваньня».

Сястра нябожчыка Ірына Пцічкіна распавяла Свабодзе:

«Эксгумацыю зрабілі 4 сьнежня. Ужо зрабілі патрэбныя экспэртызы і перазахавалі Ігара на могілках ў Сеньніцы. Вынікі стануць вядомыя празь месяц. Мы адпачатку дамагаліся расьсьледаваньня забойства Ігара, і гэта рэальны крок менавіта ў такім накірунку. Экспэрты мусяць дакладна вызначыць дзень сьмерці Ігара і паходжаньне траўмаў, якія ў яго знайшлі. Паводле сьледчага, вынікі экспэртызы стануць вядомыя празь месяц і пра іх мусяць паведаміць нашай маці, якая прызнаная пацярпелай у справе, але зь яе ўзялі падпіску пра неразгалошаньне. Паводле маіх зьвестак, маці сьледчаму пакуль давярае», — расказала Ірына Пцічкіна.

Жыцьцё 20-гадовага Ігара Пцічкіна скончылася 4 жніўня ў ізалятары на Валадарскага, куды мянчук трапіў у канцы ліпеня для адбыцьця 3 месяцаў арышту за знаходжаньне ў нецьвярозым стане за рулём аўтамабіля. Сваякі Ігара Пцічкіна мяркуюць, што ў ізалятары яго забілі, і не выключаюць, што гэта зрабілі супрацоўнікі з адмысловай каманды па задушэньні забурэньняў у вязьніцы.

Адміністрацыя ізалятару спачатку настойвала на вэрсіі, што Ігар Пцічкін памёр ад сэрца. Пасьля несанкцыянаванага пікету каля Валадаркі, у якім бралі ўдзел сваякі, сябры Ігара Пцічкіна і грамадзкія актывісты, у кастрычніку была распачатая крымінальная справа супраць лекара ізалятару паводле артыкулу аб неаказаньні патрэбнай мэдычнай дапамогі. Пра вынікі гэтага расьсьледаваньня грамадзкасьці амаль нічога невядома.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG