Што ў рэвалюцыі ўнутры: рэпартаж з Кіеўскага штаба
Вокны маёй кватэры ў Кіеве выходзяць наўпрост на памяшканьне Кіеўскай адміністрацыі. Скарочана называецца КМДА, так гэты будынак завуць усе. КМДА – Київська міська державна адміністрація.
Цяпер тут – штаб рэвалюцыі. Так і напісана на адной з калён. На другой надпіс – Попов – м…к.
Адзін з кіраўнікоў штабу распавядае, што людзі тут знаходзяцца ад 1 сьнежня. Занялі памяшканьне «ў працэсе пешай хады і народнага сходу».
Але калега-журналістка, карэнная кіяўлянка, пераконвае: занялі будынак з пачуцьця грамадзкай справядлівасьці:
«У Кіева ўжо паўтара года няма мэра, бо папярэдні пайшоў у адстаўку з-за праблем з карупцыяй, – кажа яна. Пасьля доўгая гісторыя адміністрацыйных пэртурбацыяў, вынік якой – горадам кіруе прызначаны Януковічам Аляксандар Папоў.
Гэта пра яго невядомы прадстаўнік грамадзкасьці выказаўся на калёне.
А каб трапіць у штаб, трэба адстаяць чаргу: ахвочых пабачыць «смольны» на свае вочы вельмі шмат. Праўда, чарга ідзе хутка. Ахова стаіць паўсюль, а на першым паверсе – запіс валянтэраў у народную самаабарону.
Штаб запоўнены вельмі стомленымі, вельмі занятымі і вельмі натхнёнымі людзьмі.
Тут вядуць прыём народныя дэпутаты – ад апазыцыйных партый «Удара», «Батьківшчына» і «Свобода». Юрысты аказваюць дапамогу тым, хто пацярпеў ад дзеяньняў міліцыі падчас пратэстаў.
Штаб пабіты на сэктары, і ў кожнага свая функцыя.
Тут можна падабраць сабе цёплае адзеньне, якое прынесьлі кіяне для ўдзельнікаў Майдану.
Так арганізаванае харчаваньне. Намагаюцца засьцерагчыся ад інфэкцый.
Тут адпачываюць прыежджыя і проста тыя, каму трэба адпачынак. На сьценах вісяць папяровыя аркушы з назвамі месцаў – каб людзі лягчэй знайшлі сваіх.
Раней за гэтым сталом засядаў праславуты «Папоў». Цяпер тут сядзіць намесьнік камэнданта штаба.
Подпісы зьбіраюць за: імпічмэнт Януковічу, адстаўку ўраду, вызваленьне Юліі Цімашэнкі і, напэўна, яшчэ за нешта.
А гэта фота – каб паказаць шчыльнасьць народазасяленьня.
Колькі я ў Кіеве, амаль кожную гадзіну чую, што КМДА будзе «браць „Беркут“». Але кіраўнікі штабу перакананыя, што знаходзяцца ў будынку законна, бо ён грамадзкі. «Чуткі такія ёсьць, праваахоўныя органы да нас агулам зьвяртаюцца кшталту, мы мусім яго вызваліць. Але мы тут знаходзімся на законных падставах і ніхто яшчэ нам не давёў, што гэта ня так».
А дзе засядае цяпер мясцовая адміністрацыя, яны дакладна ня ведаюць.
