9.30 У Вільні адбываецца цырымонія сустрэчы кіраўнікоў дэлегацый. З Даляй Грыбаўскайце, Жазэ Мануэлем Барозу і Германам ван Рампэем павітаўся міністар замежных спраў Беларусі Ўладзімер Макей.
Уладзімер Макей і Даля Грыбаўскайце
Уладзімер Макей
Некаторыя прэзыдэнты, прыходзячы ў палац «Літэкспа», адказваюць на пытаньні журналістаў. Прэзыдэнт Францыі Франсуа Алянд паведаміў, што ён правёў перамовы з новым прэзыдэнтам Грузіі Георгіем Маргвелашвілі, вітаў яго зь перамогай на выбарах і выказаў падтрымку тэрытарыяльнай цэласнасьці Грузіі. Адносна адмовы Ўкраіны ад асацыяцыі з ЭЗ, Алянд заявіў, што «гэта ня справа эўрапейцаў — прымаць рашэньне за ўкраінцаў».
Прэзыдэнт Румыніі Траян Басэску вітаў рашэньне Малдовы і Грузіі зрабіць важны крок у інтэграцыі з ЭЗ — парафіяваць дамовы асацыяцыі, а таксама выказаў шкадаваньне, што ад падпісаньня такой дамовы адмовілася Ўкраіна:
«Бяз гэтага вялікага посьпеху ня будзе», — заявіў ён.
Віктар Януковіч праігнараваў просьбу журналістаў адказаць на іх пытаньні і прайшоў паўз іх шэраг бяз слоў.
Прэзыдэнты сабраліся ў вялікай залі «Літэкспа». Уладзімер Макей сядзіць побач зь Віктарам Януковічам і нешта ажыўлена яму тлумачыць.
Пачынаецца цырымонія падпісаньня дакумэнтаў.
Прэзыдэнт Літвы Даля Грыбаўскайце з нагоды цырымоніі заявіла, што гэта «важны дзень, які пачынае новую будучыню для нашых усходніх партнэраў». «Але подпісы пад дакумэнтамі сьведчаць толькі аб тым, якая вялікая праца чакае ў справе іх рэалізацыі»,— сказала Грыбаўскайце.
Сёньня парафуюцца дамовы аб асацыяцыі ЭЗ з Малдовай і Грузіяй, дамова наконт аблягчэньня візавага рэжыму Эўразьвязу з Азэрбайджанам. Беларусь на гэтым саміце нічога падпісваць ня будзе.
Цырымонія падпісаньня дакумэнтаў скончылася. Прэзыдэнты фатаграфуюцца на супольнае фота і накіроўваюцца на «крулы стол».
Прэзыдэнт Эўразьвязу Герман Ван Рампэй перад падпісаньнем дакумэнтаў вітаў гатоўнасьць грамадзтваў Малдовы і Грузіі да асацыяцыі з Эўразьвязам:
«Я ведаю, што гэта прынясе шмат выгодаў усім бакам. Наступны крок у гэтым амбітным працэсе — падпісаньне дамоваў аб асацыяцыі, мы гэта зробім так хутка, як гэта магчыма ў наступным годзе».
Герман Ван Рампэй выказаў таксама перакананьне, што гэтыя дамовы далучаць Грузію і Малдову да «вялікай прасторы бясьпекі, стабільнасьці і дабрабыту на Эўрапейскім кантынэнце», гарантуюць «сувэрэнітэт і тэрытарыяльную цэласнасьць» гэтых краін.
Пачалося плернанае пасяджэньне ўдзельнікаў саміту за круглым сталом. Яно адбываецца без прысутнасьці прэсы.
Віктар Януковіч
Малдова сёньня парафавала дамову аб асацыяцыі з ЭЗ
Улад Філат
«Малдоўскі народ хоча эўрапейскай інтэграцыі і хоча ў Эўразьвяз. Мы разьлічваем, што інтэграцыйны працэс паслужыць дадатковым аргумэнтам для ўзьяднаньня з Румыніяй», — заявіў былы прэм’ер-міністар Малдовы Ўлад Філат пасьля парафававаньня дамовы аб асацыяцыі з ЭЗ.
Улад Філат перакананы, што гэта будзе карысна ўсім грамадзянам краіны:
«У нас будуць новыя палітычныя дачыненьні з ЭЗ, у нас зьявіцца доступ да рэсурсаў, інфраструктурных праектаў Эўразьвязу. Гэта абазначае магчымасьць трапіць на вялізны 500-мільённы рынак ЭЭ і бязьвізавы рэжым. Гэта вельмі важна, бязьвізавы рэжым будзе ўжо ў наступным годзе».
Улад Філат выказаў спадзеў, што ў ягонай краіне будуць новыя праекты і працоўныя месцы, а тыя малдаване, якія цяпер працуюць у Расеі, вернуцца на радзіму.
«І гэта будзе прыкладам для людзей у Прыднястроўі, што можна добра жыць у аб’яднанай краіне».
Падпісаньне дакумэнта паміж Малдовай і ЭЗ
Наш карэспандэнт Валер Каліноўскі расказаў пра хаду саміту і пагутарыў з Расьціславам Хоціным, брусэльскім карэспандэнтам украінскага агенцтва навінаў «Уніан», і зь беларускім міжнародным аглядальнікам Раманам Якаўлеўскім.
Як паведамілі па выніках Віленскага саміту Эўразьвязу Прэзыдэнт Эўразьвязу Герман Ван Ромпэй і кіраўнік Эўракамісіі Жазэ Мануэль Барозу, Беларусь пагадзілася на раней прапанаваныя Эўразьвязам перамовы аб аблягчэньні візавага рэжыму.
Вынікі саміту — ў відэарэпартажы Валера Каліноўскага
29 лістапада ў Вільні завяршаецца трэці саміт «Усходняга партнэрства» Эўразьвязу. Пра вынікі саміту ў жывой відэатрансьляцыі зь Вільні расказваюць наш карэспандэнт Валер Каліноўскі, брусэльскі карэспандэнт украінскай службы Радыё Свабода Віталь Ераміца і незалежная журналістка зь Менску Алена Данейка.
