Шэсьце ў Курапаты. Жывы рэпартаж

Зьявіўся сьцяг БХД і сьцяг «Маладой Беларусі» і БСДП (Г)

Да ўдзельніка шэсьця ў майцы з надпісам «Лукашенко, уходи» падышлі міліцыянты і папрасілі зьняць і схаваць майку, каб не было канфліктаў.

Калёна прыпынілася, таму што яшчэ падыходзяць удзельнікі. У галаву калёны сталі людзі, якія нясуць крыжы.

Радыё Свабода пачынае жывую відэатрансьляцыю.

Калёна рушыла, удзельнік скандуюць лёзунг «Жыве Беларусь!»

Падчас акцыі Радыё Свабода распаўсюджвае мапу «Беларускі нэкропаль» з пазначэньнем магілаў выбітных беларускіх дзеячаў на Ўсходніх могілках.

2 дні таму менская друкарня «Карандаш» адмовілася друкаваць гэтую мапу, палічыўшы яе агітацыйнай. Пасьля здарэньня іншыя друкарні прапанавалі сваю дапамогу, і мапу ўдалося вырабіць да Дзядоў.

Мапу можна паглядзець тут

Юрась Беленькі ў інтэрвію Радыё Свабода: Адметнасьць селетняй акцыі — тое, што большая частка ўдзельнікаў — гэта моладзь. Гэта значыць, што думкі моладзі скіраваныя ў будучыню, а значыць, Беларусь будзе жыць.

Беленькі таксама распавёў пра Дзяды 1988 году, ўдзельнікам якіх ён быў:

«Тады супраць людзей былі ўжытыя вадамёты і сьлезацечны газ. Менавіта пасьля той акцыі ў 1988 годзе пачалося гуратаваньне людзей вакол Беларускага Народнага Фронту. Сёньняшняя ўлада не перашкаджае шэсьцю Дзяды, але разам з тым ніхто з прадстаўнікоў не далучаецца да акцыі».

Беленькі тлумачыць малую колькасьць удзельнікаў тым, што людзей падчас акцыі фільмуюць супрацоўнікі спэцслужбаў.

Удзельнікаў акцыі вітаюць кіроўцы аўтамабіляў, якія едуць па праспэкце Незалежнасьці

Адзін з удзельнікаў шэсьця нясе плякат: «Дзякуй продкам за мову».

Зьявілася чорная расьцяжка «Малады фронт».

Удзельнік шэсьця ў майцы «Лукашенко, уходи», не падпарадкаваўся міліцыі і майку ня зьняў.

На сьпіне напісана: «Четырежды президент — нет! Это не президент, а царь-самозванец!»

Сябры БХД Аляксандр і Андрэй вырабілі крыж для Курапатаў. Аляксандар кажа: несьці крыж ня цяжка, таму што гэта робіцца, каб ушанаваць продкаў.

Ужо амаль на Ўсходзе. pic.twitter.com/7QIH5MibzM

— Roma Protasevich (@pr0tez) November 3, 2013

О, а вось гэта ўжо цікавей. Падслухаў, як супрацоўнікі піліцыі вядуць перапіс расцяжак :)

— Roma Protasevich (@pr0tez) November 3, 2013

Я тут заблыталася: Дзяды - гэта рэлигийнае, ци змагарскае свята?

— Гарадзенскі Бульбаш (@ksutarasevich) November 3, 2013

Калёна дайшла да станцыі мэтро «Ўсход». Насупраць Нацыянальнай бібліятэкі ўдзельнікаў віталі кіроўцы з праезджай часткі.

Маладыя ўдзельнікі шэсьця грэюцца гарбатай з тэрмасаў.