Лінкі ўнівэрсальнага доступу

На «Беларусь 5» абяцаюць «двуязычые»


21 кастрычніка Нацыянальная тэлерадыёкампанія пачынае трансьляцыі новага тэлеканалу «Беларусь 5» — гэта першы спартыўны дзяржаўны канал у краіне. Якое «меню» прапануецца заўзятарам і якая мова зносінаў будзе працоўнай?

На «Беларусь 5» перадысьлякуюцца трансьляцыі важнейшых спартовых падзеяў зь іншых тэлеканалаў. Найперш, акцэнт будзе зроблены на гульню мільёнаў — футбол. Чэмпіянаты сьвету і Эўропы, нацыянальнае першынства, адборачныя матчы нацыянальнай і моладзевай зборных, Ліга чэмпіёнаў, Ліга Эўропы — цяпер усё будзе сканцэнтравана ў адным месцы.

Не забыліся арганізатары і пра стратэгічны для Беларусі хакей: чэмпіянаты сьвету і Беларусі, гульні нацыянальнай зборнай на міжнародных турнірах, Кантынэнтальная хакейная ліга таксама перакачуюць сюды. Апроч таго, пастаянную прыпіску на пятым канале атрымаюць баскетбол, гандбол, лёгкая атлетыка, тэніс, біятлён, мастацкая гімнастыка, летнія і зімовы Алімпійскія гульні.

Як сказана ў распаўсюджаным напярэдадні прэс-рэлізе, усе трансьляцыі можна падзяліць на дзьве катэгорыі — ліцэнзыйныя і ўласнай вытворчасьці. Таму, апроч паказаў спартовых мерапрыемстваў, дырэкцыя будзе займацца прадукаваньнем тэматычных праграмаў, прысьвечаных самым папулярным відам спорту. Многія зь іх, дзеля справядлівасьці, вядомыя дастаткова даўно і проста памяняюць кнопку з іншых каналаў на «Беларусь 5»: «Час футбола» Мікалая Хадасевіча, «Авэртайм» Леаніда Лекарэвіча, «Фактар сілы» Паўла Баранава і г.д.

Між тым, як удакладняе прадстаўніца Белтэлерадыёкампаніі Сьвятлана Краскоўская, глядзець «Беларусь 5» ад панядзелка змогуць далёка ня ўсе — далучацца да вялікага спорту праз тэлевізар заўзятары будуць паступова:

На гэты момант вядома, што адной зь першых падпісала з намі дамову кампанія „Космас TV“
«Сапраўды, мы ад панядзелка пачынаем вяшчаньне „Беларусь 5“. Адзінае, што хачу ўдакладніць: кабельных апэратараў мы падключаем паступова. Таму пакуль яго ўбачаць толькі абанэнты тых апэратараў, якія ўжо заключылі ці маюцца заключыць дамовы з тэлеканалам „Беларусь 5“. На гэты момант вядома, што адной зь першых падпісала з намі дамову кампанія „Космас TV“. Адпаведна, іх абаненты з 21 кастрычніка ўжо змогуць убачыць гэты тэлеканал у сябе ў кабельных сетках».

Да працы на спартовым канале запрошаныя як штатныя, так і па-за штатныя камэнтатары. Многія зь іх ужо добра вядомыя гледачам — Уладзімер Навіцкі, які ў новай рэдакцыі будзе загадваць аддзелам камэнтатараў і падрыхтоўкі тэматычных праграмаў, Сяргей Новікаў, Павал Баранаў, Дзьмітрый Герчыкаў, Аляксандар Дзьмітрыеў, Аляксандар Казюкевіч, Мікалай Хадасевіч, Сьвятлана Парамыгіна, Аляксандар Цьвячкоўскі, а таксама новыя імёны — Сяргей Мацкевіч, Ўлада Сарокіна, Аляксей Пынцікаў, Валерыя Філяева.

Галоўны дырэктар дырэкцыі тэлеканалу «Беларусь 5» Павал Булацкі запэўнівае, што вядучыя ня будуць абмежаваныя ў моўным выбары рэпартажаў і падкрэсьлівае, што будзе захаваны прынцып існуючага ў дзяржаве «двуязычыя»:

«Мы будзем працаваць у стандартным рэжыме: калі ёсьць магчымасьць,
Калі ёсьць магчымасьць, то будзем весьці трансьляцыі на беларускай мове, калі такой магчымасьці няма — па-расейску
то будзем весьці трансьляцыі на беларускай мове, калі такой магчымасьці няма — па-расейску. У нас жа двухмоўная краіна, таму і на адной, і на другой мове будзем камэнтаваць. Але для нас гэта звычайная рэч — камэнтаваць спорт і на расейскай, і на беларускай мовах. Не сумнявайцеся: нашы камэнтатары валодаюць абедзьвюма мовамі».

Адным з прыярытэтных кірункаў сваёй дзейнасьці дырэкцыя каналу «Беларусь 5» называе фармаваньне здаровага ладу жыцьця беларускага грамадзтва з дапамогай сучасных мэдыйных рэсурсаў: «Місіяй тэлеканалу ёсьць усталяванне нацыянальнай самасьвядомасьці праз сродкі прапаганды здаровага ладу жыцьця, а таксама дасягненьні айчыннага спорту ў цэлым і асобных яго прадстаўнікоў у прыватнасьці», — гаворыцца ў распаўсюджаным паведамленьні.

Зрэшты, ня гледзячы на прапагандысцкія высілкі, беларускія спартоўцы ўсё радзей трапляюць у лік фаварытаў на міжнародных спаборніцтвах, а масавасьць фізкультурнага руху збольшага дасягаецца прымусовай мабілізацыяй на забегі актыву БРСМ.

Глядзець камэнтары (4)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG