50 гадоў ад дня сьмерці Эдыт Піяф

Радыё Свабода

10 кастрычнік 2013, 07:05

Эдыт Піяф (сапраўднае імя Эдыт Джавана Гасіён) — усясьветна вядомая французская сьпявачка і акторка — памерла 10 кастрычніка 1963 году. Праз шмат гадоў Лявон Вольскі напісаў, а Ганна Хітрык выканала песьню «Мой капітан», стылізаваную пад Піяф.

«Выкананьне песьні „Мой капітан“ — гэта ідэя Лявона Вольскага. Ён прапанаваў мне такі вобраз. Акурат у той час чамусьці шмат людзей казалі мне: „Хітрык, а чаму б табе не зрабіць спэктакль і не сыграць Піяф?“ і „Хітрык, чымсьці ты мне Піяф нагадваеш“. Вядома, я лічу, што там была частка лісьлівасьці, таму што я да яе не дацягваю. Аднак мне было вельмі прыемна. Таму я адказала Лявону, што ён проста ўгадаў, што шмат хто мяне параўноўвае зь Піяф. Тады я паглядзела шмат дакумэнтальных запісаў зь яе выступамі, фільм „Жыцьцё ў ружовых колерах“, які атрымаў некалькі „Оскараў“. Але я не магу сказаць, што падчас выкананьня песьні „Мой капітан“ цалкам скапіявала Піяф, хутчэй — зрабіла намёк на яе», — сказала Ганна Хітрык у інтэрвію Радыё Свабода.

«Мой капітан» — песьня з складанкі «Такога няма нідзе» (2009).

Эдыт Піяф памерла 10 кастрычніка 1963 году. Цела сьпявачкі перавезьлі з гораду Грас, дзе яна жыла перад сьмерцю, у Парыж пад сакрэтам. Афіцыйна пра сьмерць Піяф абвясьцілі толькі 11 кастрычніка.

Пахавалі сьпявачку на могілках Пэр-Ляшэз. Сабралася больш за 40 тысяч чалавек.