Лінкі ўнівэрсальнага доступу

У Беларусь прыбываюць расейскія вайскоўцы


Ілюстрацыйнае фота
Першы чыгуначны эшалён з расейскімі вайскоўцамі і тэхнікай прыбыў на станцыю Азярышча ў Менску для ўдзелу ў сумесных стратэгічных вучэньнях «Захад-2013».

Расейскае падразьдзяленьне забесьпячэньня сумесна зь беларускімі вайскоўцамі возьме ўдзел у разгортваньні сыстэмы кіраваньня вучэньнямі, паведамляе прэсавая служба беларускага вайсковага ведамства.

Паводле прэс-службы, вучэньне «Захад-2013» зьяўляецца лягічным працягам вучэньняў апошніх гадоў і накіравана, перш за ўсё, «на праверку функцыянаваньня сыстэмы сумеснай абароны саюзнай дзяржавы, яе здольнасьці вырашаць задачы забесьпячэньня нацыянальнай і рэгіянальнай бясьпекі».

Раней міністар абароны Расеі Сяргей Шайгу падчас свайго візыту ў ЗША запрасіў амэрыканскіх вайскоўцаў узяць удзел у беларуска-расейскіх вучэньнях «Захад-2013».

Спадар Шайгу выказаў упэўненасьць, што амэрыканцы абавязкова прыбудуць на манэўры.

Беларускае Мінабароны адмаўлялася камэнтаваць, ці змогуць амэрыканскія вайскоўцы прыехаць падчас вучэньняў і на беларускую тэрыторыю.

Сумесныя расейска-беларускія манэўры «Захад-2013» пройдуць 20–26 верасьня на тэрыторыі Беларусі і Расеі.

З расейскага боку ў іх возьме ўдзел 2500 вайскоўцаў, зь беларускага — 10 400. Будзе задзейнічана 250 адзінак вайсковай тэхнікі, у тым ліку 60 гелікоптэраў.

Польскае радыё раней выказала боязь, што вучэньні будуць мець правакацыйны характар у адносінах да краін НАТО. Польскія СМІ нагадваюць, што манэўры будуць адбывацца, апрача іншых мясьцін, і ў Берасьці, паблізу польскай мяжы.

Будучыя манэўры ўжо выклікалі неспакой Літвы і Польшчы. Міністар замежных спраў Польшчы Радаслаў Сікорскі раней заяўляў, што ягоная краіна ставіцца да іх вельмі сур’ёзна. Сёлетнія вучэньні ён параўнаў з апошнімі беларуска-расейскімі манэўрамі «Захад-2009». У тыя манэўры быў закладзены правакацыйны адносна Польшчы сцэнар, які прадугледжваў паўстаньне польскай меншасьці ў Беларусі:

«Тады мы ўздымалі гэтае пытаньне ня толькі ў двухбаковых адносінах. Я напісаў зварот да генэральнага сакратара Паўночнаатлянтычнага зьвязу, і НАТО заняло крытычную пазыцыю ў гэтай справе… У такіх справах вельмі важная адкрытасьць, празрыстасьць, каб вайсковыя назіральнікі маглі сачыць за гэтымі вучэньнямі».

Глядзець камэнтары (3)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG