Лінкі ўнівэрсальнага доступу

У Менску не рэагуюць на крок Шайгу насустрач ЗША


Сяргей Шайгу

Мінабароны Беларусі не камэнтуе запрашэньне амэрыканцаў на вучэньні «Захад-2013», зробленае міністрам абароны Расеі.

Расея запрасіла прадстаўнікоў ЗША назіраць за сумеснымі зь Беларусьсю манэўрамі «Захад-2013». Беларускае Мінабароны адмаўляецца камэнтаваць, ці змогуць амэрыканскія вайскоўцы прыехаць падчас вучэньняў і на беларускую тэрыторыю.

Міністар абароны Расеі Сяргей Шайгу падчас свайго візыту ў ЗША запрасіў амэрыканскіх вайскоўцаў узяць удзел у беларуска-расейскіх вучэньнях «Захад-2013».

Спадар Шайгу выказаў упэўненасьць, што амэрыканцы абавязкова прыбудуць на манэўры, якія праходзяць на беларускай і расейскай тэрыторыі:

«Мы сапраўды запрасілі іх (калегаў з ЗША) на вучэньні „Захад-2013“. Яны з зацікаўленасьцю гэтае запрашэньне прынялі», — цытуе Шайгу РИА Новости.

У Мінабароны Беларусі чулі гэтую заяву, але не гатовыя яе камэнтаваць. У прэсавай службе таксама не змаглі адказаць, ці пабываюць амэрыканцы падчас манэўраў на беларускай тэрыторыі і ці запрашаў Менск на гэтыя манэўры назіральнікаў з краін НАТО:

«Вучэньні носяць адкрыты характар, усе зьвесткі пра запрошаных будуць крыху пазьней удакладненыя і даведзеныя да грамадзкасьці», — толькі і сказалі Свабодзе ў прэсавай службе Мінабароны Беларусі.

Сумесныя расейска-беларускія манэўры «Захад-2013» пройдуць 20–26 верасьня на тэрыторыі Беларусі і Расеі.

З расейскага боку ў іх возьме ўдзел 2500 вайскоўцаў, зь беларускага — 10 400. Будзе задзейнічана 250 адзінак вайсковай тэхнікі, у тым ліку 60 гелікоптэраў.

Польскае радыё раней выказала боязь, што вучэньні будуць мець правакацыйны характар у адносінах да краін НАТО. Польскія СМІ нагадваюць, што манэўры будуць адбывацца, апрача іншых мясьцін, і ў Берасьці, паблізу польскай мяжы.

Будучыя манэўры ўжо выклікалі неспакой Літвы і Польшчы. Міністар замежных спраў Польшчы Радаслаў Сікорскі раней заяўляў, што ягоная краіна ставіцца да іх вельмі сур’ёзна. Сёлетнія вучэньні ён параўнаў з апошнімі беларуска-расейскімі манэўрамі «Захад-2009». У тыя манэўры быў закладзены правакацыйны адносна Польшчы сцэнар, які прадугледжваў паўстаньне польскай меншасьці ў Беларусі:

«Тады мы ўздымалі гэтае пытаньне ня толькі ў двухбаковых адносінах. Я напісаў зварот да генэральнага сакратара Паўночнаатлянтычнага зьвязу, і НАТО заняло крытычную пазыцыю ў гэтай справе... У такіх справах вельмі важная адкрытасьць, празрыстасьць, каб вайсковыя назіральнікі маглі сачыць за гэтымі вучэньнямі».

Глядзець камэнтары (1)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG