Аршанскі «даўгабуд» — у падарунак Лукашэнку

Афіцыйнай інфармацыі пра гэта няма, але нават міліцыянты, якія ахоўваюць будоўлю, называюць дату 30 жніўня — дзень народзінаў Аляксандра Лукашэнкі.

Аб’ект пад назвай «Лядовая арэна» належала здаць як мінімум тры гады таму. Аршанцы памятаюць: калі тут закладалі падмуркі будучага палаца, то абяцалі здаць яго пад навагоднія сьвяты ў 2011 годзе. Аднак праз праблемы зь фінансаваньнем гэтыя пляны ня спраўдзіліся. Хоць мясцовыя і абласныя ўлады рэгулярна давалі абяцаньні, што лядовы палац вось-вось будзе гатовы. Толькі за гэтае лета тэрміны здачы прызначалі тройчы: аршанцы чакалі адкрыцьця і ў Дзень гораду, які адзначаюць напрыканцы чэрвеня, і 15 ліпеня, падчас фэстывалю «Славянскі базар у Віцебску», і вось цяпер — у апошні летні дзень, 30-га жніўня.

За гэты працяглы час аршанскі «даўгабуд» стаўся прадметам кпінаў, жартаў і досьціпаў сярод жыхароў Воршы.


Дый сёньня аршанцы ня дужа пэўныя, што да 30 жніўня можна пасьпець усё дарабіць: каля параднага ўваходу ўжо завяршаецца добраўпарадкаваньне і ўсё выглядае калі не гатовым да працы, то хаця б прыбраным ад сьмецьця. Але з абодвух бакоў і з тылу пабудовы яшчэ стаяць будаўнічыя вагончыкі, ляжаць друз і пакуль яшчэ ня выкарыстаныя будматэрыялы.

За «Лядовай арэнай» ужо абсталяваныя новыя тэнісныя корты, але працы па добраўпарадкаваньні навакольнай тэрыторыі далёка не завершаныя. Усярэдзіне будынка таксама актыўна працуюць муляры і тынкоўшчыкі. На другім баку вуліцы Леніна асфальтуюць дзьве новыя вялікія паркоўкі, каб зьмясьціць аўтамабілі ўсіх аматараў лядовых забаваў.

Чакаецца, што такіх будзе шмат: толькі трыбуны для аматараў хакею разьлічаны на 3,5 тысячы месцаў. І гэта пры тым, што сваёй хакейнай каманды ў Воршы няма. Таксама ў «Лядовай арэне» будуць залі для боўлінгу і більярду, саўна зь невялікім басэйнам. А для тых, хто любіць забаўляцца не спартыўным чынам, будзе адчынена рэстарацыя на 100 месцаў і заля гульнявых аўтаматаў. Яе аршанцы ўжо называюць няйнакш як «казіно». І мяркуюць, што менавіта гэты «від спорту» будзе пакрываць выдаткі на ўтрыманьне лядовага палаца. З улікам таго, што ў суседняй Расеі казіно з гульнявымі аўтаматамі амаль паўсюль пад забаронай, у Воршы, пэўна, чакаюць прытоку турыстаў з пэўнымі зацікаўленьнямі…

Дарэчы, кошт утрыманьня лёду ў аршанскім палацы — трэцім па велічыні ў Беларусі — будзе складаць 8 мільёнаў рублёў у дзень. А ўсяго ў аб’ект інвэставана больш як 300 мільярдаў рублёў.

У гонар лядовага палаца нават перайменавалі аўтобусныя прыпынкі, што выклікала абурэньне гараджанаў. Раней прыпынак меў назву «Парк герояў» — бо цераз дарогу ад «Лядовай арэны» месьціцца парк зь Вечным агнём у памяць пра абаронцаў Радзімы, якія загінулі ў Вялікую Айчынную вайну. Але цяпер гарадзкія ўлады палічылі важнейшым спартовы аб’ект і памянялі шыльды на прыпынках. Праўда, на адным яшчэ засталася старая назва, але ёсьць ужо і новая…

Пра тое, што на адкрыцьцё «Лядовай арэны» 30 жніўня чакаюць «імяніньніка» Аляксандра Лукашэнку, ускосна сьведчыць і тэрміновы рамонт Шклоўскай вуліцы. Яна вядзе ў кірунку да малой радзімы Лукашэнкі, які ўжо ня раз у дзень народзінаў наведваў свае родныя мясьціны — аграгарадкі Копысь у Аршанскім раёне і Александрыю ў суседнім Шклоўскім раёне.