Лінкі ўнівэрсальнага доступу

Ужо сёньня, 3 жніўня: бардаўскі фэст у Вайцюнішках, дзень памяці Салжаніцына


Падзеі і даты гэтага дня ў Беларусі, сьвеце, гісторыі.


ПАДЗЕІ ДНЯ

Менск. Грамадзкая кампанія «У Беларусь і Эўропу — бязь візы!» арганізуе на пешаходнай вуліцы Карла Маркса арт-праект «Мастацтва бязь межаў », прымеркаваны да Дня вандроўніка. Пачатак а 14.00.

Менск. Музэй гісторыі гораду (вул. Рэвалюцыйная, 10) працяг выставы «Менск на старых паштоўках». Уваход ад 11:00 да 19:00.

Вёска Парэчча Гарадзенскага раёну. На мясцовых могілках адбудзецца ўшанаваньне памяці аднаго з кіраўнікоў нацыянальна-вызвольнага паўстаньня 1830-1831 Міхала Валовіча. Пачатак аб 11 гадзіне.

Вялікія Эйсманты, Гарадзенская вобласьць. II пешая пілігрымка Горадня — Рось (2-5 жніўня) Ранішняя служба а 7.40 у парафіяльным касьцёле ў Вялікіх Эйсмантах. Адбудзецца таксама Адарацыя Найсьвяцейшага Сакраманту.

Хутар Вайцюнішкі, Гарадзенская вобласьць. Фэстываль шансону і аўтарскай песьні (3-4 жніўня). У першы дзень выступяць Зьміцер Вайцюшкевіч і Зьміцер Бартосік, а ў другі — Віктар Шалкевіч.



3 жніўня ў Беларусі афіцыйна адзначаецца Дзень чыгуначніка.

ГЭТЫ ДЗЕНЬ У ГІСТОРЫІ

У 1492 годзе пачалася першая экспэдыцыя італьянскага мараплаўца Хрыстафора Калюмба. Ён хацеў адкрыць найкарацейшы марскі шлях з Эўропы ў Індыю. Але ў выніку экспэдыцыя адкрыла Амэрыку.

У 1923 годзе ў Менску нарадзіўся менскі падпольшчык Мікола Кедышка. У часе вайны ён разам зь сябрамі стварыў падпольную групу «Андруша». Яны рабілі дывэрсіі на гарадзкой электрастанцыі і хлебазаводзе. Загінуў Кедышка ў баі з гітлераўцамі, якія напалі на явачную кватэру. У Менску імем падпольшчыка названая вуліца.

У 1933 годзе адбылося Кобрынскае сялянскае паўстаньне. Падбухтораныя кампартыяй Заходняй Беларусі, 100 сялянаў Кобрынскага павету, узброіўшыся, разграмілі некалькі сядзібаў асаднікаў і цэлую ноч трымалі ў аблозе паліцэйскі пастарунак у вёсцы Навасёлкі. Назаўтра ўлады разагналі паўстанцаў. 30 чалавек атрымалі розныя тэрміны зьняволеньня.

У 1994 годзе Аляксандар Лукашэнка ўпершыню ў якасьці прэзыдэнта Беларусі наведаў расейскую сталіцу. Ад прыхільнасьці расейскага кіраўніцтва залежала будучыня ягонага прэзыдэнцтва. Тагачасны расейскі прэм’ер Віктар Чарнамырдзін паабяцаў дапамагчы Беларусі «парадаю і грашыма». «Яны гаварылі са мной, як з роўным. Я рады, што Расея зразумела і падтрымала мяне», — дзяліўся Лукашэнка сваімі ўражаньнямі.

Ахмадзінэжад на парадзе ў гонар дня Тэгерану
Ахмадзінэжад на парадзе ў гонар дня Тэгерану
У 2005 годзе Махмуд Ахмадзінэжад заступіў на пасаду прэзыдэнта, стаўшы першым недухоўным лідэрам Ірану за 24 гады

У 2008 годзе памёр расейскі пісьменьнік і дысыдэнт, ляўрэат Нобэлеўскай прэміі па літаратуры Аляксандар Салжаніцын. У лютым 1974 году Салжаніцын быў высланы з СССР. Жыў у Швэйцарыі, потым у ЗША. У 1994 годзе вярнуўся ў Расею.

ЦЫТАТА НА ПАМЯЦЬ

Кожны, хто абраў гвалт сваім мэтадам, няўмольна павінен абраць ману сваім прынцыпам.

Аляксандар Салжаніцын
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG