Лінкі ўнівэрсальнага доступу

Магілёўцы просяць абараніць псыхіку ад выказваньняў Лукашэнкі


Адзінаццаць магілёўцаў накіравалі генпракурору, міністру інфармацыі, старшыні камісіі па правах чалавека Палаты прадстаўнікоў і старшыні грамадзкай рады па маральнасьці зварот, у якім просяць не дапускаць публічных пагрозаў гвалту з боку кіраўніка краіны Аляксандра Лукашэнкі.

Ініцыяваў зварот мясцовы актывіст незалежнага прафсаюзу радыёэлектроннай прамысловасьці Аляксей Паўлоўскі.

Пагрозу гвалту аўтары ліста ўгледзелі ў выступе Лукашэнкі падчас нядаўняга наведваньня ім Магілёўскай вобласьці. У сюжэце, паказаным па беларускіх тэлеканалах 8 ліпеня, кіраўнік дзяржавы прыгразіў «зьняць галаву» службовай асобе.

Аляксей Паўлоўскі
Аляксей Паўлоўскі
«Гэты рэпартаж бачылі па беларускім тэлебачаньні ня толькі дарослыя, але і дзеці. І ў сьвядомасьці дзяцей, падрастаючага пакаленьня, сяброў БРСМ пагрозы жудаснай расправы — „зьняць галаву“ падначаленым міністрам — з боку гаранта правоў і законнасьці маладой незалежнай дзяржавы асацыююцца зь фільмамі жахаў», — цытуе ліст DELFI.

Падпісанты заявы просяць адказных чыноўнікаў «не дапускаць у СМІ паказу і публікацыі выказваньняў кіраўніка дзяржавы, якія могуць нэгатыўна адбіцца на псыхіцы дзяцей, а таксама дыскрэдытаваць нашу сінявокую Беларусь у вачах усясьветнай супольнасьці».

Яны лічаць неабходным абмеркаваць падобныя выказваньні на спэцыяльных слуханьнях у Палаце прадстаўнікоў, а таксама абавязаць Лукашэнку публічна выбачыцца ў СМІ перад зьняважаным міністрам, дзецьмі і тэлегледачамі.

8 ліпеня па беларускім тэлебачаньні ў навінах быў паказаны рэпартаж пра візыт Лукашэнкі ў Магілёўскую вобласьць у вёску Александрыя, дзе праводзілася сьвята Купальля. У рэпартажы кіраўнік краіны абяцаў зьняць галовы чыноўнікам, калі сельгастэхніка будзе няякасная.

Глядзець камэнтары (3)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG