Лінкі ўнівэрсальнага доступу

Скандал у Нацыянальным цэнтры інтэлектуальнай уласнасьці: масавыя звальненьні

абноўлена

Копія заявы
Копія заявы

Калектыў Нацыянальнага цэнтру інтэлектуальнай уласнасьці заяўляе, што ўлады за некалькі месяцаў разбурылі ўнікальную сыстэму інтэлектуальнай уласнасьці. З установы звольніліся работнікі.

Адпаведная заява зьмешчаная на сайце ўстановы.

«Мы ня ведаем, да чаго мы прыйдзем, але пастараемся адрадзіць тое, што наша краіна будавала на працягу больш як дваццаці гадоў і практычна разбурыла за некалькі месяцаў, палічыўшы, што ў мэтах аптымізацыі сыстэмы дзяржаўных органаў і іншых арганізацыяў разумным зьяўляецца пазбавіць спэцыялістаў патэнтнага органа статусу дзяржаўных служачых...

Мы будзем працягваць гаварыць пра ўнікальнасьць беларускай сыстэмы інтэлектуальнай уласнасьці і людзей, якія яе фармуюць... Мы губляем наш кадравы патэнцыял, паколькі, аддаўшы многія гады службе нашай дзяржаве, спэцыялісты патэнтнага ведамства вымушаны шукаць іншай працы на іншых дзяржаўных пасадах, у іншых арганізацыях, якія дазволяць нам хаця б захаваць той узровень заработнай платы, які, і так невысокі, дазваляў утрымліваць іхнія сем’і.

Мы спадзяемся, што ўсе, хто звольніўся 28 чэрвеня 2013 году ў сувязі з адмовай ад працягу працы ў зьмененых умовах, хутка вернуцца. Вар’яцтва ня можа цягнуцца доўга. А ці ж не вар’яцтва, калі ў арганізацыі не застаецца кіраўніка і тых асобаў, якія побач зь ім прымаюць патрэбныя дзяржаве рашэньні...»

У лісьце паведамляецца, што 19 красавіка 2013 году ў Адміністрацыю прэзыдэнта Рэспублікі Беларусь быў накіраваны зварот за подпісамі 140 чалавек.

Супрацоўнік Цэнтра Інтэлектуальнай уласнасьці распавёў Радыё Свабода:

«У чэрвені звольнілася 23 чалавекі. Гэта толькі тое, што я ведаю. У адпаведнасьці з указам прэзыдэнта нас з 1 ліпеня ўсіх пазбавілі дзяржслужбы. Нашае матэрыяльнае становішча пагоршылася ў каго ў паўтара, у каго ў два разы. У кантракце напісана, што калі становішча пагоршылася, супрацоўнікі маюць права перараваць кантракт. Вось супрацоўнікі і пазвальняліся, і кіраўніцтва пазвальнялася. Мелі поўнае права. Камітэт па навуцы і тэхналёгіях (вышэйшая інстанцыя — рэд.) ніякіх мераў не прымаў. Таму ў нас цяпер няма аніводнага зама, ані дырэктара. Мы проста добрасумленна працуем. Няма каму камэнтаваць. Сышлі людзі, у іх сем’і, дзеці. У нас заробак у вядучага інжынера 2 мільёны 700 тысяч была. А калі яшчэ пагоршыць, дык што гэта?!»


Юры Лукашэвіч, прэс-сакратар Дзяржаўнага камітэта па навуцы і тэхналёгіях: «Нічога крытычнага не адбываецца. Сытуацыя пад кантролем. На сёньня, 2 ліпеня, у НЦІУ ёсьць кіраўнік. Выканальнік абавязкаў дырэктара прызначаны загадам Дзяржаўнага камітэту па навуцы і тэхналёгіях. Гэта Броўкін Пётар Мікалаевіч. Чалавек ён дасьведчаны, падрыхтаваны, вяртаецца на тую ж сьцяжыну, зь якой і пачынаў. Апошняе месца ягонай працы — Савет міністраў.

І другое — цяпер дапрацоўваецца праект пастановы ўрада па пытаньнях аплаты працы работнікаў НЦІУ. Пакуль я не гатовы агучыць сумы, якія там закладзеныя, але падкрэсьлю, што значнае падвышэньне заработнай платы прадугледжанае. Мы хочам кампэнсаваць страты, якія яны панесьлі ў выніку пазбаўленьня статусу дзяржслужачага».

Лукашэвіч кажа, што да людзей ставіліся з разуменьнем, але дзейнічалі ў рамках паўнамоцтваў: «Прасілі пачакаць, бо дакумэнт знаходзіцца ў вышэйстаячай арганізацыі (Савет міністраў — рэд). Пакуль ён не падпісаны».

Юры Лукашэвіч ня ведае, колькі супрацоўнікаў НЦІУ звольнілася, але пацьвярджае, што звольніліся два намесьнікі дырэктара.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG