Лінкі ўнівэрсальнага доступу

Тавары лёгкай прамысловасьці могуць падаражэць у 4 разы


Эканаміст Леў Марголін, прэсавая сакратарка АГП Ганна Красуліна, старшыня арганізацыйнай групы па стварэньні беларускага прафсаюзу прадпрымальнікаў «Разам» Ірына Яскевіч
Эканаміст Леў Марголін, прэсавая сакратарка АГП Ганна Красуліна, старшыня арганізацыйнай групы па стварэньні беларускага прафсаюзу прадпрымальнікаў «Разам» Ірына Яскевіч

Да 85% беларускіх прадпрымальнікаў, якія займаюцца продажам тавараў лёгкай прамысловасьці, ад 1 ліпеня могуць спыніць сваю працу.

Гэта прывядзе найперш да «вымываньня» з продажу танных тавараў і значнага падаражэньня іншых. Такі сумны прагноз прагучаў сёньня адразу ў двух месцах — на прэсавай канфэрэнцыі, якую правялі ў Менску ініцыятары страйку віцебскіх прадпрымальнікаў, і на нарадзе грамадзкага аб’яднаньня «Пэрспэктыва».

Гандляры-прадпрымальнікі мусяць мець сэртыфікат якасьці на тавары, якія яны прадаюць. Цяпер гэтая праблема вырашаецца проста — дастаткова мець сэртыфікат, які выдае фабрыка альбо той аптовы прадавец, у якога тавар купляўся. Аднак з 1 ліпеня ўсё кардынальна зьмяняецца. Пасьля стварэньня Мытнага зьвязу Расеі, Казахстану і Беларусі згодна з Адзіным мытным рэглямэнтам сэртыфікат якасьці можна браць толькі ў спэцыяльных цэнтрах.

На кантроль трэба прынесьці як мінімум пяць узораў, — тлумачыць старшыня арганізацыйнай групы па стварэньні беларускага прафсаюзу прадпрымальнікаў «Разам» Ірына Яскевіч. І кажа, што ў шмат якіх выпадках гэта ўся партыя:

«Калі ты здаеш пяць узораў, два зь іх псуюць. Адбываецца так званы разбуральны кантроль. Табе вернуць толькі тры. І за гэтае „цудоўнае задавальненьне“ ты яшчэ заплаціш два мільёны. І таму атрымліваецца, што сацыяльныя тавары, а бальшыня носіць і купляе менавіта іх, вырастуць у цане як мінімум у чатыры разы, альбо будуць „вымывацца“. Мы ж цудоўна разумеем, што тапачкі па цане белвэстаўскіх чаравікаў ніхто ня купіць».

Менавіта на гэта і зьвярнулі ўвагу прадпрымальнікі Віцебску, якія правялі 6 чэрвеня аднадзённы страйк. «Чаму ж вас не падтрымалі ў іншых рэгіёнах?» — спытаўся я ў Ірыны Яскевіч:

«У нас гэта была не стыхійная акцыя. У Віцебску са сьнежня мы абмяркоўвалі гэтую тэму. Калі б так рабілі ўсе…»

«Мы маем плян сваіх дзеяньняў» — заявіў сёньня «Свабодзе» пасьля сустрэчы ў дэпартамэнце прадпрымальніцтва Міністэрства эканомікі Беларусі старшыня «Пэрспэктывы» Анатоль Шумчанка:

«Мы абазначылі крайні пункт — 24 чэрвеня. Мы праінфармавалі, што калі да гэтай даты ня будзе прынята ніякіх рашэньняў, то зь вялікай верагоднасьцю можна казаць, што прадпрымальнікі ня будуць выплачваць падаткі і пойдуць у адпачынак на знак пратэсту. А мы створым штаб і пачнём дзейнічаць у абарону нацыянальных інтарэсаў беларускіх прадпрымальнікаў».

Леў Марголін
Леў Марголін
«Калі Пуцін, Назарбаеў і Лукашэнка стваралі Мытны зьвяз, то яны абяцалі велізарныя выгоды і перавагі. Але насамрэч адна накладка ідзе за другой, — адзначае эканаміст Леў Марголін:

«Схемы Мытнага зьвязу і Адзінай эканамічнай прасторы скапіяваныя са схемаў Эўразьвязу. Але нашыя „інтэгратары“ забыліся пра тое, што Эўразьвяз ішоў да гэтага 45 гадоў. А мы хочам адразу перанесьці гэтыя штампы на нашу прастору. А яшчэ не выходзіць і таму, што Расея, Казахстан і Беларусь маюць зусім розныя эканомікі. У Расеі, напрыклад, 75 альбо нават 80% эканомікі — прыватная. У нас, калі не лічыць акцыянэрныя таварыствы, якія цалкам кантралюе дзяржава, такой не набярэцца і 20%».
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG