Лінкі ўнівэрсальнага доступу

Акцыя ў Лёндане: «Аддайце цела!»

абноўлена

фота: Мікалай Халезін

Сёньня ў трох месцах у Лёндане праваабарончая кампанія «Free Belarus Now» правяла акцыю пратэсту супраць сьмяротнага пакараньня ў Беларусі і афіцыйнай практыкі невяртаньня целаў расстраляных іх сем’ям.

Пра дэталі сёньняшняй акцыі расказаў арт-дырэктар Беларускага Свабоднага тэатру Мікалай Халезін:

«Працяг кампаніі мы заплянавалі на 6 чэрвеня. Гэтая дата невыпадковая — менавіта 6 чэрвеня быў адкрыты «другі фронт» войскамі саюзьнікаў, што дазволіла пераможна завяршыць Другую сусьветную вайну.

Сёння а 8-й гадзіне раніцы, у час пік, на трох галоўных плошчах Лёндану — Трафальгарскай, Вэстмінстарскай і Пікадылі маладыя людзі забраліся ў пакеты для памерлых і замерлі ў іх на гадзіну.

Гэта былі валанцёры, якія адгукнуліся на наш заклік, падтрыманы Джудам Лоў, прыняць удзел у кампаніі.

Сярод удзельнікаў — гледачы Свабоднага тэатру, брытанскія студэнты, акторы нашай трупы, простыя лёнданцы, якія адгукнуліся на заклік. Цікава, што адно з брытанскіх выдавецтваў — Oberon — брала ўдзел у акцыі ў поўным складзе».

Напярэдадні актывісты кампаніі разаслалі ва ўсе эўрапейскія і міжнародныя структуры, а таксама ў найбуйнейшыя брытанскія сродкі масавай інфармацыі пакеты для памерлых з паліцэйскімі біркамі, на якіх былі пазначаны імёны тых, хто быў выкрадзены, забіты ці пакараны - Дзьмітрыя Завадскага, Юрыя Захаранкі, Віктара Ганчара, Анатоля Красоўскага, Алега Бябеніна, Дзьмітрыя Канавалава, Улада Кавалёва.

У лісьце было патрабаваньне да эўрапейскіх структураў аказаць жорсткае ўзьдзеяньне на беларускія ўлады, заклікаўшы выканаць нашы патрабаванні.

Мікалай Халезін паведаміў, што такія самыя пакеты былі разасланыя ў беларускія дзяржаўныя ўстановы, якія маюць дачыненьне да забойстваў або ўтойваньня фактаў. Лісты былі іншага зьместу - пра тое, што гэтыя структуры мелі і маюць дачыненьне да дзеяньняў, якія пацягнуць за сабой крымінальную адказнасьць.

Учора адбылася сустрэча міністра замежных спраў па справах Эўропы Дэйвіда Лідынгтана зь Любоўю Кавалёвай, Настай Палажанкай і Натальляй Калядой.

Сёння ўвечары пасьля спэктаклю адбудзецца грамадзкая дыскусія пры ўдзеле Любові Кавалёвай, Насты Палажанкі, Ірыны Багданавай і Натальлі Каляды. Весьці дыскусію будзе адвакат Біл Браудэр, аўтар Акту Магніцкага.

На 11 чэрвеня запланяванае адкрыцьцё фотавыставы Саймана Ананда і Мікалая Халезіна, на якой будзе прэзентаваны плакат "Fuck Realpolitik" (дызайн - Ягор Шумскі і Мікалай Халезін), які стане адным з афіцыйных постэраў кампаніі, накіраванай супраць палітыкі двайных стандартаў.

Таксама пройдзе дыскусія, у якой возьмуць удзел арт-дырэктар Свабоднага тэатру Натальля Каляда, адвакат, які выратаваў ад смяротнага пакарання больш за 300 чалавек, Клайв Стафард Сміт і легендарны мадэльер Вівіен Ўэствуд. Плянуецца сусьветны стрымлайн-рэпартаж гэтай дыскусіі.

Кампанія «Аддайце цела!» («Give a Body Back!») стартавала ў кастрычніку летась, калі адбылася прэм’ера спэктаклю Свабоднага Тэатру «Trash Cuisine» у Амстэрдаме. Кампанія ўключае ў сябе шэраг патрабаваньняў:

1. Адмену сьмяротнага пакараньня ў Беларусі.
2. Завяршэньне расьсьледаваньня справаў па зьніклых і вяртаньне іх целаў сваякам.
3. Вяртаньне целаў пакараных іх родным і блізкім.
4. Вызваленьне палітвязьняў.

5 кастрычніка 2012 году ў людных месцах Амстэрдаму некалькі дзясяткаў валанцёраў ляжалі ў пакетах для памерлых. Паралельна быў арганізаваны збор подпісаў пад пэтыцыяй. Гэтым разам мы вырашылі працягнуць кампанію ў Лёндане, дзе 30 траўня пачаўся сэт паказаў спэктаклю «Trash Cuisine» на сцэне тэатру Young Vic.

Ініцыятары кампаніі Give a Body Back - Натальля Каляда, Мікалай Халезін, Ірына Багданава і Free Belarus Now.

фота: Мікалай Халезін










***

Крымінальна-выканаўчы кодэкс Рэспублікі Беларусь

Артыкул 175

Парадак выкананьня сьмяротнага пакараньня

Пункт 5. Адміністрацыя ўстановы, у якой выконваецца сьмяротнае пакараньне, абавязаная паведаміць пра зьдзяйсьненьне прысуду суду, які вынес яго, а суд паведамляе аднаму са сваякоў. Цела для пахаваньня не выдаецца, аб месцы пахаваньня не паведамляецца.

Глядзець камэнтары (2)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG