Лінкі ўнівэрсальнага доступу

Крычаў: ПМК судзіцца зь незалежнай газэтай


Сяргей Няроўны

5 чэрвеня Крычаўскі раённы суд пачаў разгляд пазову Чэрыкаўскай перасоўна-мэханізаванай калёны супраць незалежнага выданьня з Крычава «Вольны горад».

Кіраўніцтва ПМК вінаваціць газэту ў распаўсюдзе непраўдзівых зьвестак, якія нібыта дыскрэдытуюць прадпрыемства і мясцовую вэртыкаль улады. Журналісты заяўляюць, што прэтэнзіі пазоўнікаў не аргумэнтаваныя і палітычна матываваныя.

Нагодай для суду сталася публікацыя пад назвай «Прыгонныя» ў лютаўскім нумары газэты — пра аплату працы ў ПМК. У невялікім артыкуле гаварылася, што работнікі прадпрыемства не атрымліваюць у час заробкі. Кіраўніцтва прадпрыемства ўгледзела ў публікацыі тое, што яна перасьледавала адзіную мэту — дыскрэдытаваць кіраўніцтва ПМК і раённую вэртыкаль улады. Спачатку, як стала вядома сёньня на судзе, адміністрацыя прадпрыемства зьвярнулася ў крычаўскую міліцыю, каб супраць журналістаў завялі крымінальную справу. У гэтым заяўнікам было адмоўлена. Тады пазоў быў пададзены ў суд. ПМК патрабуе прызнаць зьвесткі непраўдзівымі і надрукаваць у газэце абвяржэньне.

Рэдактар незалежнага выданьня Сяргей Няроўны і ягоны выдавец Уладзімер Кудраўцаў пазоў ПМК назвалі неаргумэнтаваным. У пераліку прычынаў называліся фармальныя падставы (юрыдычныя хібы ў складаньні пазову), а таксама тое, што пазоўнік сказіў сутнасьць артыкула. Паводле Сяргея Няроўнага, у публікацыі няма сьцьверджаньня, што заробкі не выплачваліся ў ПМК, а толькі пераказвалася, што было паведамлена праз тэлефон аўтару артыкула. Акрамя таго, тлумачыў суду Няроўны, пазоўнік у сваіх прэтэнзіях не патлумачыў, якім чынам публікацыяй былі дыскрэдытаваныя кіраўніцтва ПМК і раённая вэртыкаль улады.

Судзьдзя Аляксандар Курылін прапанаваў бакам прымірыцца, аднак тыя не прыйшлі да паразуменьня. Начальнік ПМК Аляксей Фралоў, аргумэнтуючы сваю пазыцыю, заявіў, што пасьля публікацыі ўзьнікаюць складанасьці з падраднымі арганізацыямі. Паводле Фралова, гэтыя арганізацыі задаюць пытаньні, як зь імі будуць разьлічвацца, калі ПМК ня можа выплаціць у час заробкі сваім працаўнікам.

Сяргей Няроўны да суду заяўляў, што пазоў палітычна матываваны. Аргумэнтаваў гэта тым, што ў ім згадваецца чэрыкаўская раённая вэртыкаль улады, якую нібыта таксама, як і ПМК, дыскрэдытавалі. Пасьля сёньняшняга судовага пасяджэньня спадар Няроўны працягвае настойваць:

«Так, палітычна матываваны. Калі судзьдзя запытаў кіраўніка ПМК-280, чаму не ўрэгулявалі пытаньні з спрэчным артыкулам да суду, дык той ня ведаў, што адказаць. Для іх — толькі суд, толькі ў міліцыю. Яны баяцца лютасьці ідэалягічнага аддзелу выканкаму, які, як я лічу асабіста, замоўца гэтай справы».

Спадар Няроўны заяўляе, што рэдакцыя выданьня намагалася залагодзіць спрэчку з ПМК, але кіраўніцтва прадпрыемства адмовілася ісьці на кантакт.

Пачуць меркаваньне самога Аляксея Фралова адносна закіду Няроўнага, што прэтэнзіі ПМК палітычна матываваныя, па заканчэньні сёньняшняга судовага паседжаньня не ўдалося. Ён адмовіўся гаварыць з журналістам і адразу пасьля суду зьехаў.

Сёньня суд высьветліў пазыцыі бакоў. Сяргей Няроўны азнаёміўся зь фінансавымі дакумэнтамі, якія прадставіў суду пазоўнік. 14 чэрвеня суд працягне разгляд грамадзянскай справы.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG