Суд Ашмянскага раёну прызнаў фотаальбом Belarus Press Photo 2011 экстрэмісцкім. З фотажурналістаў будзе спагнана па 200 тысяч рублёў дзяржаўнай пошліны і яшчэ па 17,5 тысячы рублёў судовых выдаткаў.
Рашэньне суду можна абскардзіць цягам 10 дзён у Гарадзенскім абласным судзе.
Адвакат Юліі Дарашкевіч Аляксандар Бірылаў зазначыў Свабодзе, што ў судовым рашэньні не ўказана, што рабіць з канфіскаванымі экзэмплярамі фотаальбома.
Бірылаў заявіў, што рашэньне суда будзе абскарджана цягам 10 дзён.
ВАДЗІМ ЗАМІРОЎСКІ:
«У прынцыпе, рашэньне мяне ня моцна зьдзівіла. Хаця да апошняга часу у глыбіні душы я спадзяваўся, што яно будзе ўсё ж такі на нашу карысьць. Зразумела, мы ня згодныя, і будзем абскарджваць судовае рашэньне».
ЮЛІЯ ДАРАШКЕВІЧ:
«Рашэньне было прадказальным. Па тым, як праходзіў учора суд, было зразумела, што іншага рашэньня быць ня можа».
Карэспандэнтка: «А ці зьбіраецеся вы абскарджваць?»
«Так, безумоўна, мы будзем рыхтаваць скаргу і будзем старацца прайсьці ўсе магчымыя інстанцыі»
Адвакат Аляксандар Бірылаў
___________________________________
На паседжаньні 17 красавіка прадстаўнікі аргкамітэту коннкурсу Belarus Press Photo 2011 прасілі суд не задавальняць заявы КДБ.
У суд выклікалі фатографаў Юлію Дарашкевіч, Вадзіма Заміроўскага і Аляксандра Васюковіча.
Менавіта ў іх 12 лістапада 2012 году супрацоўнікі памежнага пераходу «Каменны лог» забралі 41 асобнік фотаальбома Belarus Press Photo 2011, які журналісты перавозілі на прыватным аўтамабілі зь Літвы.
Разам з позваю фатографы атрымалі копію заявы, якую УКДБ па Гарадзенскай вобласьці адправіла ў суд. З заявы вынікае, што фотаальбом прызнаны экстрэмісцкім на падставе экспэртнай ацэнкі. Экспэртамі выступілі начальнік упраўленьня ідэалягічнай працы Гарадзенскага аблвыканкаму Павал Скрабко і тры выкладчыкі Гарадзенскага дзяржунівэрсытэту імя Янкі Купалы.
Фотагалерэя:
КДБ лічыць гэта экстрэмізмам
Экспэртыза канфіскаваных летась на мытні альбомаў «Прэс-фота Беларусі» за 2011 год прызнала іх экстрэмісцкімі. КДБ распачаў справу. У суд выклікаюць Юлію Дарашкевіч – фатографа і арганізатара конкурсу «Прэс-фота Беларусі», а таксама фатографа Вадзіма Заміроўскага.
Фота, у якіх экспэртыза пабачыла экстрэмізм і абразу нацыянальнай годнасьці грамадзянаў Беларусі.
Здымкі з сайту Belarus Press Photo (pressphoto.by) публікуюцца з дазволу арганізатараў конкурсу.
