Лінкі ўнівэрсальнага доступу

МАЗ пераходзіць на чатырохдзённы працоўны тыдзень


Менскі аўтазавод пераходзіць на чатырохдзённы працоўны тыдзень з-за праблемаў са збытам гатовай прадукцыі.

пачакайце

No media source currently available

0:00 0:02:50 0:00
Наўпроставы лінк

Працоўныя незадаволеныя дадатковым выходным днём. Адмыслоўцы мяркуюць, што беларускаму МАЗу на расейскім рынку складаюць канкурэнцыю эўрапейскія аўтаканцэрны.

Пра скарачэньне працы да чатырох дзён на тыдзень працаўнікі МАЗу ведаюць і праз чуткі, і з афіцыйных паведамленьняў. Стаўленьне да факту аднолькавае: людзі незадаволеныя, бо дадатковы выходны дзень пацягне за сабой скарачэньне заробкаў. Гутару з працоўнымі МАЗу каля прахадной прадпрыемства:

Карэспандэнтка: «Ці чулі вы што-небудзь на МАЗе пра скарачэньне працоўнага тыдня?»

Працоўны: «Так, чуў. Пятніца будзе выходным днём. Чатырохдзёнка застаецца».

Карэспандэнтка: «Ці тлумачаць, з чым гэта зьвязана?»

Працоўны: «Перавытворчасьць тэхнікі. МАЗам няма збыту».

Карэспандэнтка: «Як вы да гэтага ставіцеся?»

Працоўны: «Хвалююся за заробкі — сям’я, дзеці, кошты растуць, а жыць жа трэба».

Іншы працоўны: «Былі такія размовы. Але цяпер, нібыта, адменена, бо павялічыліся адзінкі экспарту».

Карэспандэнтка «Як да гэтага ставяцца людзі?»

Працоўны: «Як хто. Камусьці зручна было б, каб гэта было летам, бо летам лецішчы, вёскі — многія выяжджаюць. А цяпер, як такое надвор’е, то што рабіць?»

Працоўная: «Так, казалі пра гэта. Але, нібыта, усё нармальна стала».

Карэспандэнтка: «Ці будзеце рады дадатковаму выходнаму дню?»

Працоўная: «Не. Хоць штосьці зараблялі, а што будзе, калі дома сядзець?»

Працоўны: «Быў загад, што працоўныя дні зь пятніцаў сакавіка пераносяцца на кастрычнік і лістапад. І фармулёўка ў загадзе была: са зьмяншэньнем росту продажу аўтатэхнікі на расейскія рынкі».

Карэспандэнтка: «Як вы да гэтага ставіцеся?»

Працоўны: «Вядома, дрэнна. Меншыя заробкі будуць, менш грошай будзе — а што зробіш?»

Іншы працоўны: «Будзем казаць так: меркаваньне неадназначнае — нехта рады, а нехта не. Маё меркаваньне такое: трэба працаваць».

Былы дарадца генэральнага дырэктара МАЗу, а цяпер кіраўнік Агенцтва дзелавых сувязяў Валянцін Лопан мяркуе, што скарачэньне працоўнага часу на МАЗе — зьява заканамерная:

Валянцін Лопан
Валянцін Лопан
«Нічога дзіўнага няма ў тым, што МАЗ скарачае працоўны тыдзень. Бо расейскі рынак ад пачатку году таксама скарачаецца. Якія таму прычыны — гэта тэма асобнай гаворкі, але гэта ўжо рыначны факт. Да прыкладу, асноўны канкурэнт МАЗу на расейскім рынку — КамАЗ — у студзені і лютым таксама працаваў паводле скарочанага тыдня. Таму, пэўна, цяпер прыйшла чарга МАЗу рабіць тое ж самае. Бо нельга ж прадукцыю ставіць на склад і ня ведаць, калі яна будзе прадавацца. Бо на складзе — грошы, і немалыя».

Скарачэньне паставак аўтамабіляў МАЗ у Расею на пачатку году паўтараецца пэрыядычна. Адна з прычынаў — вялікая колькасьць выходных дзён у суседняй краіне падчас навагодне-калядных сьвятаў. Уплываюць на гэта і пытаньні расейскай бюджэтна-фінансавай палітыкі. Але ўсё больш пачынаюць заяўляць пра сябе новыя аспэкты рынку, кажа Валянцін Лопан:

«Зьявіўся новы працэс — гэта канкурэнцыя, нармальная рынкавая канкурэнцыя. Вытворцы з краінаў Эўропы амаль што ўсе адкрылі ў Расеі свае вытворчасьці альбо імпарт. І іх доля на расейскім рынку расьце значна хутчэй, чым айчынных вытворцаў. Гэта азначае, што доля сваіх прадпрыемстваў скарачаецца, а замежных — нарастае. Гэта канкурэнцыя паводле тэхнічных, якасных паказчыкаў і гэтак далей. Гэтая тэндэнцыя вельмі яскрава праглядаецца: у тых сэгмэнтах грузавой тэхнікі, дзе КамАЗ і МАЗ здалі свае пазыцыі, замежныя вытворцы павялічылі. Лічбы самі сабой сьведчаць пра гэтую тэндэнцыю. У гэтай сувязі неабходна прымаць нейкія стратэгічныя рашэньні, але ад МАЗу гэтага пакуль што не чуваць і не відаць».
XS
SM
MD
LG