Адвакат кіроўцы «Поршэ Каен»: Суд не ўлічыў, што пешаход таксама парушыў правілы
Кіроўцу «Поршэ Каена» Андрэя Забабуру суд прызнаў вінаватым у парушэньні правілаў дарожнага руху і сьмерці празь неасьцярожнасьць школьніка Ўлада Грудзьева.
15 лютага скончыўся працэс над менскім бізнэсоўцам Андрэем Забабурам, які на аўтамабілі «Поршэ Каен» насьмерць зьбіў трэцяклясьніка Ўладзіслава Грудзьева. Трагедыя здарылася летась 13 лістапада ў двары менскай школы № 23. Судзьдзя Фрунзенскага суду Менску Юлія Блізьнюк прызнала Андрэя Забабуру вінаватым у парушэньні правілаў дарожнага руху, што мела наступствам сьмерць чалавека празь неасьцярожнасьць, і прысудзіла кіроўцу 4 гады пазбаўленьня волі з адбыцьцём пакараньня ў калёніі-пасяленьні. Прысуд цалкам супаў з тым пакараньнем, якога дамагаўся пракурор.
Андрэй Забабура на пачатку працэсу і ў апошнім слове не прызнаў сябе вінаватым, але пры гэтым папрасіў прабачэньня ў пацярпелых і сказаў пра маральную адказнасьць за сьмерць хлопчыка. Максымальнае пакараньне паводле артыкула, які быў выстаўлены Андрэю Забабуру — 5 гадоў зьняволеньня. Тое, што яму далі 4 гады, адвакат падсуднага Ігар Папкоўскі назваў «дастаткова суровым прысудам, нават калі прызнаць, што ён парушыў правілы дарожнага руху».
«Па-першае, кіроўца ня быў у стане алькагольнага ап’яненьня. Плюс трэба было ўлічыць умовы: што было цёмна, што фактычна пешаход таксама парушыў правілы, бо перабягаў перад аўтамабілем дарогу. Хоць гэтага пешахода цяжка было б папракаць, але факт ёсьць факт. Пешаходам забаронена выбягаць на праежджую частку з-за аўтамабіляў, як і выходзіць з-за транспартнага сродку на праежджую частку. Такія пэўныя абставіны справы суд таксама павінен быў улічыць. Устаноўлена, што хуткасьць машыны была 18 кілямэтраў на гадзіну, а магчыма, і меней. Такім чынам, кіроўцу нельга папракнуць, што ён выбраў няправільную хуткасьць».
Паводле адваката Ігара Папкоўскага, ягоны падабаронны ніяк ня мог прадухіліць наезд на хлопчыка за тыя 3 сэкунды, якія ў яго былі паводле экспэртызы МУС. Довады адваката: усё адбывалася ў цёмны час, да таго ж бакавым зрокам немагчыма ўбачыць і зрэагаваць на небясьпеку гэтак хутка. Што ў Забабуры былі гэтыя 3 сэкунды, адвакат таксама сумняваецца. Ігар Папкоўскі спаслаўся на дадзеныя незалежнага экспэрта Аляксандра Канапліцкага, паводле якога іншыя аўтамабілі стаялі ўздоўж дарогі шчыльней, чым вызначыла экспэртыза МУС, а значыць, нельга было заўважыць набліжэньне хлопчыка да дарогі з-за прыпаркаваных аўтамабіляў.
Ігар Папкоўскі заявіў пасьля суду, што прысуд будзе абавязкова абскарджаны ў вызначаны законам тэрмін. Брат падсуднага Андрэя Забабуры, які прысутнічаў на працэсе, пасьля абвяшчэньня прысуду ня стаў яго камэнтаваць.
Устрымаліся ад камэнтару і маці ды сваякі загінулага Ўлада Грудзьева. Раней падчас судовых спрэчак яны праз адваката заявілі, што пагодзяцца зь любым рашэньнем суду.
Прадстаўніца пацярпелых, адвакат Ксенія Кобаса сказала, што прадбачыць касацыйную скаргу і таму выказвацца наконт рашэньня зарана. На пытаньне, чаму пацярпелы бок быў супроць прызначэньня судом новай комплекснай экспэртызы з удзелам незалежнага экспэрта, Ксенія Кобаса сказала, што ў пацярпелых не было падстаў не давяраць экспэртнаму заключэньню, якое зрабілі ў міліцыі. Прадстаўніца пацярпелых назвала «значнай» суму грошай, якую абвінавачаны Андрэй Забабура ўжо сплаціў пацярпелай Алене Грудзьевай у якасьці падтрымкі, але сказала, што сьмерць дзіцяці нельга ацаніць ніякімі грашыма.
У прысудзе судзьдзі Юліі Блізьнюк утрымліваецца таксама адмысловае вызначэньне на адрас адміністрацыі школы № 23, у якім прадпісана цягам месяца зрабіць захады бясьпекі на прышкольнай тэрыторыі і паведаміць пра іх.
Меру стрыманьня Андрэю Забабуру не зьмянілі. З суду яго вывелі ў кайданках.
Андрэй Забабура, кіруючы аўтамабілем «Паршэ-Каен», 13 лістапада 2012 каля менскай школы № 23 на вуліцы Панчанкі ўчыніў ДТЗ, у якім загінуў школьнік. Кіроўца абвінавачваецца паводле ч.2 арт.317 крымінальнага кодэксу (парушэньне правілаў дарожнага руху, што пацягнула па неасьцярожнасьці сьмерць чалавека).
