Ва ўсіх энцыкляпэдыях датаю нараджэньня Язэпа Драздовіча пазначанае 13 кастрычніка. Але паводле ўспамінаў ягоных землякоў, мастак гаварыў, што нарадзіўся на Пакровы. Пра гэта ён пісаў і ў сваім дзёньніку. Таму менавіта 14 кастрычніка дасьледнікі й прыхільнікі творчасьці Язэпа Драздовіча ладзяць пашанотныя імпрэзы на ягонай радзіме на Дзісеншчыне і ў мясьцінах, зьвязаных з жыцьцёвымі сьцяжынамі мастака.
У Менску Драздовіч жыў і працаваў непрацяглы час пасьля абвяшчэньня Беларускай Народнай Рэспублікі. Дзе дакладна, невядома, але на думку мастака Міколы Купавы, гэта быў Верхні горад. Тут у адным з гістарычных дамкоў група энтузіястаў яшчэ ў 1979 годзе прапаноўвала стварыць музэй Язэпа Драздовіча. Але тады ўлады палічылі гэта непатрэбным. Тым ня менш, ідэя заставалася і было спадзяваньне, што некалі чыноўнікі нарэшце прызнаюць надзвычайны талент мастака вартым музэю. Але нядаўна прыгледжаны пад музэй гістарычны дом зьнішчылі.
Гаворыць адзін з ініцыятараў стварэньня музэю Драздовіча ў Менску мастак Мікола Купава:
(Купава: ) “Жывыя сьведкі памяці пра Драздовіча зьнікаюць. Зьнікалі — і вось, аказваецца, зьнікаюць і цяпер. Мы ж думалі, што ўжо ўсё гэта спыненае. Нам абяцалі, што ўжо ніводзін будынак ня будзе разбураны ў Верхнім горадзе. Гэта ж не абы-дзе. Гэта тое самае, што прыйшлі ў маскоўскі Крэмль ды ўзялі адзін будынак і зьнішчылі. Верхні горад — гэта наш запаведнік архітэктурны, гэта ахоўная зона, дзе нішто не павінна ні разбурацца, ні будавацца, а там гаражы будуюць…”
На сёньня дасьледнікі творчасьці Драздовіча выявілі ў музэях Беларусі, Літвы і ў прыватных зборах каля 300 яго твораў. З рэпрадукцыяў зь іх Мікола Купава ўклаў альбом-манаграфію “Язэп Драздовіч”, якая выйшла летась у выдавецтве “Беллітфонд”. Гэтае ўнікальнае выданьне, а таксама сьціплыя помнікі на магіле непадалёк ад роднага засьценка Пунькі ды ў сталічным Траецкім прадмесьці — гэта ўсё, чым ушанаваны ў Беларусі мастак, талент якога адмыслоўцы ставяць калі ня вышэй, дык, прынамсі, нароўні з шырака ганараваным землякамі талентам літоўскага мастака Мікалоюса Чурлёніса.
