Лінкі ўнівэрсальнага доступу

ЯК БУДЗЕ ВЫЗНАЧАЦЬ "СЯМЁРКА" АДЗІНАГА КАНДЫДАТА АД “ПЯЦЁРКІ”?


Юры Сьвірко, Менск

Паводле ўхваленага сёньня рашэньня пра ўзгадненьне працэдуры выхаду на адзінага кандыдата, калі спадары Ганчарык, Домаш, Казлоўскі, Калякін і Чыгір ня змогуць вызначыцца з кандыдатурай адзінага прэтэндэнта, тады канчатковае рашэньне будзе прымаць адмысловая калегія, у якой будзе 7 чалавек.

Склад гэтай калегіі мусіць папярэдне ўзгадняцца зь пяцёркай. На выпадак няўдачы ўзгадненьня "сямёркі" аўтары праекту — Аб'яднаная грамадзянская партыя — прапануюць зацьвердзіць склад калегіі "шырокай грамадзянскай кааліцыяй".

Што стаіць за гэтымі словамі? Старшыня АГП Анатоль Лябедзька мяркуе, што калегію-"сямёрку" будуць фармаваць прыкладна 50 чалавек, якія мусяць валодаць рэальнымі рэсурсамі — ці то матэрыяльнымі, ці то чалавечымі, — найперш лідэры апазыцыйных партыяў.

Я задаў спадару Лябедзьку гэткае пытаньне: ці ня будзе яшчэ цяжэй абраць 7 выбарцаў, чым толькі аднаго зь пяцёркі?

(Лябедзька: ) "Залежыць ад таго, ці ёсьць давер да працэдуры. Калі да працэдуры ёсьць давер, дык людзі пагаджаюцца. Калі ў іх ёсьць нейкі сумнеў, яны яе будуць адхіляць. І нам трэба трэба якраз знайсьці балянс інтарэсаў.

Тут прысутнічаюць розныя групы. Я, напрыклад, роўна аддалены ад усіх кандыдатаў, таму мне, магчыма, лягчэй асабіста. Але ведаю, нават практычна амаль на 99%, хто за кім стаіць. І цяжка прайсьці вось гэты балянс інтарэсаў.

Калі прапануюцца рашэньні, якія на карысьць таму ці іншаму кандыдату, гэтая не падыходзіць працэдура. Таму мы павінны, па-першае, паспрабаваць саміх кандыдатаў уключыць у гэтую працэдуру, а па-другое, каб быў нейкі давер паміж тымі людзьмі, якія тут прадстаўленыя", — сказаў Анатоль Лябедзька, лідэр АГП.

На маю просьбу ён пракамэнтаваў сёньняшнюю прапанову Юр'я Хадыкі — вызначыць адзінага кандыдата простым лёсаваньнем.

(Лябедзька: ) "Ну, гэта апошняе. Самае апошняе, якое можа быць. Я думаю, усё ж такі ў нас ёсьць пэўная палітычная культура й нейкі вопыт палітычнага жыцьця ў Беларусі, каб мы прыбягалі вось да такога скрайняга мэтаду. Але яго адвяргаць ня трэба, гэта таксама працэдура, гэта таксама мэханізм.

Я думаю, што тут спадар Хадыка меў на увазе, што ня столькі істотна, хто будзе з гэтых людзей. І прыкладна патэнцыял у іх крыху лепшы, крыху горшы. Але самае галоўнае — каб мы гэтую нішу адзінага кандыдата занялі. Вось гэта прынцыпова. Як толькі мы яе не займаем, мы прайграем. Калі мы яе займаем, у нас ёсьць добры шанец на перамогу", — зазначыў спадар Лябедзька.

Цікава, што нікога зь пяцёркі, чый лёс нібыта вызначаўся сёньня, на паседжаньні не было, хаця аргкамітэт іх усіх запрасіў. Чаму пяцёрка праігнаравала запрашэньне? Вось адказ Станіслава Шушкевіча:

(Шушкевіч: ) "Вельмі цяжкае пытаньне. Цяпер, калі яны зьбіраюць подпісы, ёсьць шанец мець гэтыя 100 тысячаў подпісаў — вельмі цяжка фактычна ад іх адрачыся напярэдадні рэгістрацыі. І я, напрыклад, і не чакаў, што яны прымуць такое рашэньне".

А вось як адказаў на тое ж пытаньне Анатоль Лябедзька:

(Лябедзька: ) "Я думаю, што гэта не адпавядае іхным інтарэсам. Я пра гэта гаварыў. Іх інтарэс зараз — цягнуць разгляд гэтага пытаньня як мага далей. А там — як, кажуць, ці асёл здохне, ці цар-падышах падзе".

Лідэр адной з сацыял-дэмакратычных партыяў Станіслаў Шушкевіч на сёньняшнім паседжаньні нават прапанаваў у выпадку няўдачы з вызначэньнем адзінага кандыдата ад пяцёркі падтрымаць Міхаіла Марыніча. Ці разглядаюць гэта як сур’ёзны варыянт?

(Шушкевіч: ) "Гэта проста быў прыклад".

(Карэспандэнт: ) "Паўжартам?"

(Шушкевіч: ) "Ну, гэта ня жарт. Проста трэба знаходзіць катэгарычную форму ў нашых няпростых умовах".

XS
SM
MD
LG