Падчас нарады Аляксандар Лукашэнка, як звычайна, перапыняў міністраў ды іншых высокапастаўленых чыноўнікаў, задаваў ім няёмкія пытаньні, пагражаў, кагосьці караў, камусьці дараваў.
Адна з галоўных тэмаў нарады — тыя ўнёскі, якія павінны зрабіць беларускія банкі й прадпрыемствы на пасяўную кампанію. Прынцып гэтак званага добраахвотнага ахвяраваньня вызначыў сам Аляксандар Лукашэнка.
Гаворачы, у прыватнасьці, пра замежныя нафтавыя кампаніі, што працуюць на беларускім рынку, ён адзначыў: "Калі ахвяраваў — няхай застаецца на рынку. Не захоча ахвяраваць — у нас іншыя фірмы знойдуцца". Зьвяртаючыся да віцэ-прэм’ера Кокарава, адказнага за паліўна-энэргетычны комплекс, Лукашэнка падсумаваў: "Хто адмовіцца ахвяраваць — дакладзіце мне".
Сярод прадпрыемстваў узорам самаахвярнасьці была названая Беларуская чыгунка, якая падаравала сялу 10 000 тон дызэльнага паліва. Сярод банкаў — "Прыёрбанк", які пералічыў 2 мільярды рублёў на пасяўную нават раней за вызначаны адміністрацыяй прэзыдэнта графік такіх выплатаў. Аляксандар Лукашэнка паабяцаў узнагародзіць кіраўніка "Прыёрбанку" Касьцючэнку мэдалём. "А іншыя прыватныя банкі таксама трэба напружваць", — падсумаваў Лукашэнка.
Да якіх мэтаў імкнецца Аляксандар Лукашэнка, арганізоўваючы штогод падобныя нарады ў жывым этэры? Які вобраз хоча ўмацаваць падобнымі акцыямі? На гэтую тэму разважае навуковец, псыхааналітык Уладзімер Падгол.
(Падгол: ) "Для асноўнай масы людзей, выбаршчыкаў Лукашэнка прадстане ў вобразе найперш гаспадара, па-другое — уладара, які валодае ўсёй краінай і распараджаецца ўсімі. Гэта клапатлівы гаспадар, для якога першае — чалавек, народ.
Асабліва ў канцы трохгадзінавай нарады, калі Лукашэнка сказаў, што мы мусім гэтага мэханізатара накарміць, апрануць, пасадзіць на трактар — усё-ўсё яму даць. А гэты мэханізатар нібыта нейкая казюрка, якая мэханічна ўсё зробіць.
Вельмі эфэктна глядзеліся спробы падштурхнуць і бізнэсоўцаў, і банкіраў, і дзяржаўныя ўстановы выдзяліць паліва, грошы — усё, што трэба сялу. Я думаю, сельскія выбаршчыкі ў гэты момант адчувалі сабе богаабранымі, узьнесенымі ў неба".
Уладзімер Падгол лічыць, што мэнталітэт вясковых беларусаў апошнія гады мала зьмяніўся. Ва ўмовах адсутнасьці прыватнай уласнасьці вобраз клапатлівага і ўсемагутнага гаспадара, які прымярае да сябе Лукашэнка, усё яшчэ мае ўплыў на сельскіх выбаршчыкаў.
