Прадстаўнікі парлямэнцкае “тройкі”, бальшыня якіх прыехала
ў Беларусь сёньня, сьцьвярджаюць, што ня маюць статуса міжнародных назіральнікаў
за выбарамі. Разам з тым, сябры эўрапейскае дэлегацыі ня вырашылі не даваць
сваіх камэнтароў адносна пабачанага ў Беларусі да выніковае прэсавае канфэрэнцыі,
якая адбудзецца ў Менску 16 кастрычніка.
Адразу па прылёце ў Менск, дакладчык у справах Беларусі Парлямэнцкай
асамблеі Рады Эўропы Вольфганг Бэрандт, кіраўнік падкамітэту Эўрапарлямэнту
Ян Віерсма, а таксама іншыя прадстаўнікі эўрапейскіх структураў накіраваліся
у амбасаду Францыі, дзе адбылася нарада з амбасадарамі краінаў ЭўраЗьвязу,
што працуюць у Беларусі. Нарада працягвалася даволі доўга, і пасьля яе
заканчэньня Вольфганг Бэрандт паведаміў нашаму радыё:
“Мы прыехалі сюды ня ў якасьці афіцыйных міжнародных назіральнікаў,
а як прадстаўнікі нашых парлямэнтаў. І мы хочам мець асабістае ўяўленьне
пра тое, як тут праходзяць выбары. Мы — не назіральнікі.
Каб я быў назіральнікам, дык прехаў бы ў Беларусь нашмат раней і нас было
б нашмат болей, а так мы прыехалі толькі ўтрох. Сёньня таксама мы сустрэліся
з прадстаўнікамі амбасадаў краінаў ЭўраЗьвязу й сяброў Рады Эўропы і скаардынуем
нашыя дальнейшыя дзеяньні”, — паведаміў дакладчык у справах Беларусі Эўрапейскага
парлямэнту Вольфганг Бэрандт.
З францускай амбасады, дэлегацыя эўрапейскае “тройкі” накіравалася на
сустрэчу з Аляксандрам Лукашэнкам. Гэтая сустрэча больш нагадвала маналёг
аднаго чалавека… А.Лукашэнка доўга гаварыў пра тое, што Беларусь выканала
ўсе патрабаваньні міжнародных структураў і цяпер чакае ўзаемнасьці ад Эўропы.
“Што мы яшчэ ня выканалі, каб вы прызналі нашыя выбары?”, — пытаў А.Лукашэнка
сяброў “тройкі”. “Эўрапейцы” больш слухалі й натавалі ягоныя выказваньні…
Пасьля сустрэчы са спадаром Лукашэнкам старшыня Парлямэнцкай асамблеі
АБСЭ Адрыян Севярын, дакладчык у справах Беларусі Парлямэнцкай асамблеі
Рады Эўропы Вольфганг Бэрандт і кіраўнік падкамітэту ў справах Беларусі
Эўрапарлямэнту Ян Віерсма вырашылі не даваць журналістам ніякіх камэнтароў
адносна сваіх сустрэчаў да заканчэньня візыту, г. зн. да 16 кастрычніка,
каб ня быць абвінавачванымі ў прадузятасьці.
Тым ня менш прадстаўніца Эўрапейскага парлямэнту спадарыня Элізабэт
Шродтэр невялікі камэнтар нашаму радыё ўсё ж такі дала. Гаворыць Элізабэт
Шродтэр:
“Мы прыехалі паглядзець на агульную сытуацыю, прааналізаваць тое, што
адбываецца цяпер, і што будзе пасьля выбараў. Я яшчэ раз заяўляю, што мы
— не афіцыйныя назіральнікі за выбарамі і ня дзеля таго сюды
прыехалі. У нас іншыя задачы. Беларускія ўлады ня выканалі ўмовы, каб выбары
былі свабодныя. Мы прыхалі дзеля збору інфармацыі, бо мы зацікаўленыя,
каб Беларусь ня трапіла ў ізаляцыю, а назіраньне за выбарамі — ня нашая
задача”, — паведаміла нашаму радыё Элізабэт Шродтэр.
Увечары сябры эўрапейскае “тройкі” сустракаліся зь лідэрамі беларускай
апазыцыі. Сустрэча адбывалася ў будынку Кансультацыйна-назіральнае групы
АБСЭ. Там “эўрапейцаў” сустракаў пікет сяброў Кансэрватыўна-Хрысьціянскае
партыі БНФ. Пікетоўцы патрабавалі неадкладнай адстаўкі старшыні КНГ АБСЭ
Ганса-Георга Віка. Пікетоўцы таксама пратэставалі супраць назіраньня за
выбарамі эўрапейскай “тройкаю”.
Статус міжнародных назіральнікаў, нададзены сябрам “тройкі” беларускай
Цэнтравыбаркамай, таксама не спадабаўся і лідэрам аб’яднанай апазыцыі,
што прыйшлі на сустрэчу з “эўрапейцамі”. Апазыцыянэры доўга вагаліся —
браць удзел у такой сустрэчы ці не… Толькі пасьля таго, як сябры “тройкі”
запэўнілі апазыцыю, што прыехалі ня дзеля назіраньня за выбарамі, а статус
назіральнікаў беларускія ўлады надалі ім супраць іхнае волі, спадары Вячорка,
Лябедзька, Калякін, Нісьцюк, ды іншыя пагадзіліся на сустрэчу. Гэтая сустрэча
скончылася позна ўвечары і яе вынікі невядомыя.
Альгерд Невяроўскі, Менск
Самае папулярнае
1