Лінкі ўнівэрсальнага доступу

Ужо выходныя, 14-15 ліпеня: моцныя дажджы, Грунвальдзкая бітва, 150 гадоў Клімту, а ў народзе – Казьма і Дзям'ян, у кузьнях не працуюць


Насьценны каляндар да 130-годзьдзя Якуба Коласа
Насьценны каляндар да 130-годзьдзя Якуба Коласа

Бліц-агляд падзеяў і тэмаў у Беларусі, сьвеце, гісторыі.

НАДВОР'Е

Будзе няўстойлівае, прыйдуць кароткачасовыя, часам моцныя дажджы, навальніцы, тэмпэратура ўдзень у суботу 17-24, у нядзелю 19-26 цяпла.

У БЕЛАРУСІ І СЬВЕЦЕ

У суботу каля сьценаў Мірскага замку пройдзе міжнародны фэстываль электроннай музыкі, мэта якога падтрымаць драўляную гістарычную забудову Горадні.

У Віцебску працягваецца «Славянскі базар».

Дзяржсакратар ЗША Гілары Клінтан наведвае зь візытам Эгіпет і Ізраіль.

ГЭТЫ ДЗЕНЬ У ГІСТОРЫІ

14 ліпеня

1913 – у Вільні заснаванае Беларускае выдавецкае таварыства.

1941 – Чырвоная армія пад Оршай упершыню ўжыла «кацюшы».

1978 – Вярхоўны Савет БССР прыняў закон аб ахове і выкарыстаньні помнікаў гісторыі і культуры.

15 ліпеня

1410 – пад Грунвальдам адбылася бітва аб'яднанай арміі Вялікага княства Літоўскага і Польскай кароны з войскамі Тэўтонскага ордэну. Перамога продкаў беларусаў перапыніла ўзброеную экспансію немцаў на славянскія землі на наступныя амаль 500 гадоў.

У гэтыя дні нарадзіліся:

14 ліпеня 1862 году, 150 гадоў таму, – Густаў Клімт, аўстрыйскі мастак, яркі прадстаўнік стылю мадэрн. Адной з самых любімых яго тэмаў быў пацалунак, рамантычна ўвасоблены ў некалькіх славутых палотнах.

15 ліпеня 1675 году – Станіслаў Панятоўскі, войскаводзец, прадстаўнік найвышэйшай беларускай магнатэрыі.

15 ліпеня 1876 году – паэтка, дзяячка Беларускай сацыялістычнай грамады, асьветніца Алаіза Пашкевіч (Цётка). Выдавала кніжкі і падручнікі для дзяцей, часопіс «Лучынка». Памерла ў 1916 годзе, калі дапамагала хворым на тыф.

15 ліпеня 1900 году – паэт Уладзімер Дубоўка, сябра «Маладняка» і «Ўзвышша», арыштаваны ў справе «Саюзу вызваленьня Беларусі», шмат гадоў правёў у ссылках. Яго пяру належыць верш «О Беларусь, мая шыпшына», які пасьля Чарнобылю многія назавуць прарочым.

У гэты дзень памерлі:

15 ліпеня

1410 – Ульрых фон Юнгінген, 26-ы вялікі магістар Тэўтонскага ордэну.

1904 – Антон Чэхаў, расейскі пісьменьнік, драматург, лекар.

2009 – Натальля Эстэмірава, расейская праваабаронца, журналіст, супрацоўніца Праваабарончага цэнтру «Мэмарыял» у Грозным.

ЁСЬЦЬ НАГОДА

14 ліпеня ў Беларусі традыцыйна ўшаноўваюцца Кузьма і Дзям’ян. У народзе іх лічылі апекунамі сенакосу і падрыхтоўкі да жніва. А Кузьму – паводле сугучнасьці імя – яшчэ й апекуном кавальства. Таму ў кузьнях у гэты дзень не працавалі.

МІНУС 365

Пасол Францыі параўнаў вязьняў Бастыліі з асуджанымі ў справе 19 сьнежня ў Беларусі

Асуджаны за маўчаньне актывіст трымае галадоўку ў Жодзіне

Папа прызначыў новага нунцыя ў Беларусі

ЦЫТАТА НА ПАМЯЦЬ

О, Беларусь, мая шыпшына,
Зялёны ліст, чырвоны цьвет.
У ветры дзікім не загінеш,
Чарнобылем не зарасьцеш.

Уладзімір Дубоўка
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG