Паводле неафіцыйных дадзеных, што паступаюць з розных крыніц, у апэрацыі "Перахоп" задзейнічана некалькі сотняў супрацоўнікаў сілавых структур. Трыста міліцыянтаў прачэсваюць лес каля вёскі Кіраўка, дзе па некаторых зьвестках могуць хавацца чальцы групоўкі. У паветра паднятыя міліцэйскія гелікоптэры, прыцягнутыя кінолягі. Усе дарогі, уключна з фэдэральнай трасай ва Ўладзівасток, кантралююць узмоцненыя нарады міліцыі. Шукаюць пяць маладых мужчын зь вёскі Кіраўкі, іх абвінавачваюць у сэрыі нападаў на супрацоўнікаў органаў унутраных спраў на працягу апошніх двух тыдняў, у выніку якіх адзін міліцыянт забіты, двое параненыя ў перастрэлцы.
"Да крайнасьці дзяцей давяло бязьмежжа ў Кіраўскай міліцыі"
Паводле карэспандэнта Радыё Свабода ва Ўладзівастоку Марыны Лабады, пацьвярджаецца вэрсія аб тым, што напады на міліцыянтаў зьвязаны зь лістом, які паступіў сёлета ў траўні ў аддзяленьні міліцыі, пракуратуры, суды Прыморскага краю, а таксама ў шэраг мясцовых газэтаў.
– У лісьце невядомыя выставілі ультыматум: спыніць бясчынства ў праваахоўных структурах, пачаць нарэшце барацьбу з карупцыяй у органах улады. У адваротным выпадку аўтары абяцалі перайсьці да рашучых дзеяньняў. Тэрмін ультыматуму мінуў.
Гэтую вэрсію пацьвердзіў і бацька аднаго з удзельнікаў групоўкі. Па словах Уладзімера Саўчанкі, да крайнасьці дзяцей давяло бязьмежжа ў Кіраўскай міліцыі: "Яны хацелі зьвярнуць увагу кіраўніцтва міліцыі і пракуратуры на тое, што адбываецца ў сілавых структурах ў правінцыі, іх не пачулі".
"Іх параўноўваюць з Рэмба, з Робін Гудом, жадаюць, каб яны прарваліся, каб яны далей змагаліся зь бязьмежжам міліцыі"
Улада проста ня хоча слухаць сваіх грамадзянаў, перакананы былы супрацоўнік спэцслужбаў, а цяпер дэпутат думы Ўладзівастоку Мікалай Маркоўцаў:
– Улада ўсімі сіламі робіць выгляд, што нічога не адбываецца, што гэта нейкія адмарозкі ... Хоць глядзіш на фатаграфіі гэтых пяці чалавек – нармальныя хлопцы, ніякія не адмарозкі. Зьявілася інфармацыя ў інтэрнэце: аказваецца, зь імі вельмі жорстка абыйшлася міліцыя ... Адзін з іх, Саўчанка Раман, паступіў у мараходку, вярнуўся нядаўна з Калінінграду са спаборніцтваў па стральбе, дзе заняў прызавыя месцы. Вяртаецца ў родную вёску – яго хапае міліцыя, б'е і прымушае прызнавацца, што ён абрабаваў нейкую дачу. Двух хлопцаў да гэтага зьбілі так, што яны паўтара месяца валяліся па шпіталях. Я думаю, што, вядома, яшчэ псыхалёгія слабая, маладая, надломленая.
І калі зь імі вось так паступілі, яны проста пайшлі на крайнія меры. Таму што ня бачаць ніякай абароны ад дзяржавы. Няма куды зьвярнуцца... Таму на інтэрнэт-форумах людзі, практычна ўсе, падтрымліваюць гэтую групоўку, якая па сутнасьці робіць злачынства – забівае міліцыянтаў. Іх параўноўваюць з Рэмба, з Робін Гудом, жадаюць, каб яны прарваліся, каб яны далей змагаліся зь бязьмежжам міліцыі ... Вось што зьдзіўляе. Вось над чым трэба задумацца ўладзе: званок для іх празьвінеў вельмі сур'ёзны, калі людзі ўжо пачалі партызанкай займацца ... – кажа дэпутат Мікалай Маркоўцаў.
Бацька аднаго з удзельнікаў групоўкі зьвярнуўся да генэрала міліцыі Андрэя Нікалаева з просьбай адмяніць загад страляць на паражэньне, – паведамляе Марына Лабада.
Назіральнікі і ў Прымор'і, і ў Маскве вылучаюць самыя розныя вэрсіі матываў, якімі кіраваліся сябры групоўкі, нападнікі на міліцыянтаў і атрымалі нечаканую падтрымку насельніцтва.
"80 адсоткаў людзей, якія на форуме абмяркоўваюць гэта, падтрымліваюць гэтых маладых людзей"
На думку галоўнага рэдактара краёвай грамадзка-палітычнай газэты "Народнае веча" Марыі Салавенкі, тое, што адбываецца, наўрад ці можна назваць бандыцкімі разборкамі – хутчэй гэта грамадзянскі пратэст:
– На жаль, вось у такія пачварныя формы пратэст выліваецца. Вельмі цяжкое жыцьцё ў Прымор'і. Многія людзі зьвяртаюцца і ў праваахоўныя органы, і да губэрнатара, і да мэраў. Але зь іх патрэбамі, нават дробнымі, іх цынічна адфутбольваюць.
У гэтым сяле Горныя Ключы, я пагутарыла зь людзьмі. Мне сказалі, што цяпер спэцназ узяў пад ахову трох міліцыянтаў і што гэта тыя самыя міліцыянты, якія самыя нахабныя, самыя цынічныя, агідна сябе паводзяць у дачыненьні да людзей. Начальнік міліцыі даў загад, каб, дзе можна, міліцыянты ў форме не хадзілі ...
Цяпер інтэрнэт у нас проста гудзе – абмяркоўваюць вось гэтых маладых людзей, якія сьвядома пайшлі на гібель; я думаю, што, вядома, яны ня выжывуць, іх будуць зьнішчаць, загад быў такі дадзены – страляць на паражэньне. І, ведаеце, страшна: 80 адсоткаў людзей, якія на форуме абмяркоўваюць гэта, падтрымліваюць гэтых маладых людзей. І тлумачаць, чаму падтрымліваюць: таму што ўлада, пішуць, у тым ліку і ў Прымор'і зусім стала нахабнай, – распавяла ў эфіры Радыё Свабода аб настроях сваіх землякоў рэдактар мясцовай газэты Марыя Салавенка.