Лінкі ўнівэрсальнага доступу

Моладзь выказала патрабаваньні кандыдатам на прэзыдэнта


Прадстаўнікі 12 моладзевых арганізацый правялі сумеснае паседжаньне, на якім падпісалі Мэмарандум і прынялі дзьве рэзалюцыі.


У паседжаньні ўдзельнічалі моладзь БХД, «Малады Фронт», моладзь БНФ, «Правы альянс», моладзь кампаніі «Гавары праўду», моладзь руху салідарнасьці «Разам», «Вольная моладзь», «Маладая Беларусь», «Ініцыятыва», маладыя дэмакраты, моладзь Кангрэсу дэмакратычных прафсаюзаў і моладзь сацыял-дэмакратычнай партыі «Народная грамада».

Падчас паседжаньня моладзевыя актывісты прынялі рэзалюцыю, у якой заявілі, што не прызнаюць выбары ў мясцовыя саветы і лічаць гэтыя органы самаабвешчанымі.

У другой рэзалюцыі маладыя людзі заявілі аб падтрымцы кандыдата на прэзыдэнта, які зробіць усе магчымыя захады для яднаньня зь іншымі апазыцыйнымі сіламі, закліча людзей на пратэст супраць фальсыфікацыі выбараў.

У сваю чаргу, актывісты ўзялі на сябе адказнасьць за мабілізацыйную кампанію і арганізацыю вулічных акцый у выпадку фальсыфікацыі выбараў.

Падпісанты «Мэмарандуму беларускай моладзі» заклікалі ўсіх кандыдатаў на прэзыдэнта ад пачатку сваёй перадвыбарчай дзейнасьці заклікаць людзей ня толькі прыходзіць на выбарчыя ўчасткі, але й на плошчу ў дзень галасаваньня.

А на плошчы ён абавязаны патрабаваць і адстойваць сапраўдны падлік галасоў і дамагацца справядлівых выбараў.

Лідэр «Маладога фронту» Зьміцер Дашкевіч паведаміў «Свабодзе», што прадстаўнікі моладзевых арганізацый правядуць бліжэйшым часам новую сустрэчу для каардынаваньня сваіх дзеяньняў.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG