Міністэрства абароны Беларусі абяцала пасьля адпаведнай праверкі абнародаваць канчатковыя вынікі расьсьледаваньня. Калі яны стануць вядомыя, спыталася “Свабода” .
“Як толькі вынікі расьсьледаваньня будуць падведзеныя, вы убачыце іх на сайце Мінабароны. Калі гэта здарыцца – адказаць ня можам. Але відавочна, што адмыслова цягнуць з гэтым ніхто ня будзе”, – сказаў супрацоўнік прэсавай службы Мінабароны.
Нагадаем, што катастрофа адбылася на авіяцыйным шоў у Радаме 30 жніўня 2009 году. Загінулі пілёты Аляксандар Марфіцкі і Аляксандар Жураўлевіч, якія адвялі свой самалёт убок ад жылых раёнаў і цаной свайго жыцьця прадухілілі больш маштабную катастрофу. Абодва пілёты былі ў званьні палкоўнікаў, Марфіцкі быў намесьнікам камандуючага Заходнім апэратыўна-тактычным камандаваньнем ВПС і СПА Беларусі, Жураўлевіч – намесьнікам камандзіра 61-й зьнішчальнай авіябазы, што месьціцца ў Баранавічах. Гэтай жа авіябазе належаў і самалёт.
