Пра гэта заявіў сёньня міністар замежных спраў гэтай непрызнанай рэспублікі Сяргей Шамба.
Сяргей Шамба меў на ўвазе нядаўнія рэкамэндацыі беларусам у сувязі зь іх паездкамі ў Абхазію і Паўднёвую Асэтыю, якія даў некалькі тыдняў таму адказны прадстаўнік беларускага замежнапалітычнага ведамства Аляксандар Лукашэвіч.
“На жаль, прадстаўнікі беларускага МЗС выказаліся недастаткова карэктна”, — заявіў Шамба. Паводле ягоных слоў, нават Нямеччына і Польшча, якія робяць падобныя рэкамэндацыі для сваіх суграмадзянаў, выбіраюць больш далікатныя фармулёўкі. Напрыклад, яны ня раяць суайчыньнікам пасьля Абхазіі наведваць Грузію.
“Сухумі вядома, што папярэджаньні беларускіх дыпляматаў былі зьвязаныя з арыштам ці затрыманьнем беларусаў пасьля наведваньня Абхазіі грузінскімі памежнымі ўладамі. Аднак усё ж падобныя папярэджаньні трэба рабіць больш тактоўна”, — падкрэсьліў Шамба. З боку беларускага МЗС, дадаў абхаскі міністар, ужо прыйшоў ліст, што Менск не здымае з парадку дня пытаньне аб прызнаньні Абхазіі.
