Альбом будзе называцца Alma Mater. Акрамя рэлігійных песьняў на італьянскай, партугальскай, французскай і нямецкай мовах, прысьвечаных Дзеве Марыі ў выкананьні пантыфіка, туды ўвойдуць і сучасныя кампазыцыі брытанскага, італьянскага і паўночнаафрыканскага паходжаньня.
“Прыгажосьць гэтай музыкі павінна паразіць слухачоў. Зьдзіўляе і якасьць музыкі, і яе разнастайнасьць”, цытуе газэта генэральнага мэнэджэра студыі Рыкарда Фэрнандэса.
Назвы твораў пакуль не агалошваюцца, аднак вядома, што часткова яны былі запісаныя Каралеўскім філярманічным аркестрам на знакамітай з часоў “Бітлз» студыі Abbey Road.
Дыск зьявіцца ў продажы 30 лістапада, а заробленыя на ім грошы Geffen Records плянуе часткова аддаць на навучаньне бедных дзяцей музыцы, піша Guardian .
Нагадаем, што Папа Рымскі Бэнэдыкт XVI часта зьвяртаецца да вернікаў і праз партал YouTube.