Лінкі ўнівэрсальнага доступу

Навінкі беларускага ВПК — Маскве ці Пэкіну?


Аляксандар Лукашэнка і Анатоль Сердзюкоў
Аляксандар Лукашэнка і Анатоль Сердзюкоў

А.Лукашэнка выступіў за актывізацыю супрацоўніцтва з Расеяй у галіне вайскова-прамысловага комплексу.

Cёньня ў Менску з рабочым візытам знаходзіўся міністар абароны Расейскай Фэдэрацыі Анатоль Сердзюкоў. Ён сустракаўся са сваім беларускім калегам Леанідам Мальцавым і прэзыдэнтам Аляксандрам Лукашэнкам. Апошні выказаўся за актывізацыю супрацоўніцтва з Расеяй у галіне ваенна-прамысловага комплексу.

Аляксандар Лукашэнка сказаў сёньня Анатолю Сердзюкову, што гатовы падзяліцца з Расеяй беларускімі напрацоўкамі ў ваенна-прамысловым комплексе:

“Мы хацелі б, каб патэнцыял, як у савецкія часы, Беларусі, нашай эканомікі, створаны ў ВПК, быў запатрабаваны. А запатрабаваны ён можа быць ня толькі тут, у Беларусі, але і ў Расейскай Фэдэрацыі. А так часам атрымліваецца, што ў нас з Кітайскай Народнай Рэспублікай, зь некаторымі краінамі больш эфэктыўнае супрацоўніцтва, чым з Расеяй. Я маю на ўвазе найноўшае ўзбраеньне, яго распрацоўку”.

Павал Казлоўскі
Павал Казлоўскі, былы міністар абароны Беларусі, зьдзіўлены гэтай заявай:

“Цяжка сказаць, што тут мелася на ўвазе. Тут наагул камэнтаваць цяжка. Цяжка таму, што ня бачна, дзе тут лёгіка, у чым яна? Чаму раней ня ставілася пытаньне пра гэта — давайце разам рабіць. А тут ці то крыўда, ці што іншае?”

Генэрал Казлоўскі кажа: у практыцы вайскоўцаў заўжды было так, што кожная краіна супрацоўнічае найперш са сваімі саюзьнікамі. У Беларусі такіх саюзьнікаў два — Расея, зь якой існуюць двухбаковыя дачыненьні, і краіны АДКБ (Арганізацыі дамовы пра калектыўную бясьпеку).
І Расея, і Беларусь уваходзяць у АДКБ. А вось Кітай — не.
І Расея, і Беларусь уваходзяць у АДКБ. А вось Кітай — не, падкрэсьлівае былы міністар абароны.

Таму і трэба арыентавацца “Найперш на АДКБ, калі створана такая групоўка. Да таго ж унутры яе нядаўна арганізавалі агульную групу апэратыўнага рэагаваньня. Тады — тым больш. І яшчэ пры стварэньні групы публічна казалася на саміце АДКБ, што для яе патрэбна самае сучаснае і самае якаснае ўзбраеньне. Ну дык калі ласка. Як кажуць, і карты ў рукі, няхай выкарыстоўваюць і нашу, беларускую навуку. Мне падаецца, што гэтае выказваньне Лукашэнкі ўсё ж у піку Расеі. Зноў па прынцыпе: мы — добрыя, а вы — благія…”

Анатоль Сердзюкоў, адказваючы Аляксандру Лукашэнку, зазначыў, што Расея мае дастаткова сур’ёзныя пляны наконт актывізацыі супрацоўніцтва зь Беларусьсю. Міжнародны аглядальнік Раман Якаўлеўскі лічыць, што тут маецца на ўвазе ў першую чаргу пастаўка ў Беларусь ракетных комплексаў С-400. І Беларусь хоча, каб найноўшае ўзбраеньне дасталася ёй за расейскі кошт, падкрэсьлівае аглядальнік:

Раман Якаўлеўскі
“На апошнім саміце краінаў АДКБ Расея афіцыйна ўзяла на сябе абавязкі перааснасьціць арміі краінаў, якія ўваходзяць у арганізацыю, па расейскіх коштах. І зразумела, што найперш гэта тычыцца найбліжэйшага саюзьніка — Беларусі. Не выпадкова, што перад гэтым візытам у мэдыях, у прыватнасьці ў расейскім „Коммерсанте“, зьявілася інфармацыя пра тое, што Беларусь жадае набыць найноўшае ўзбраеньне, а менавіта ракетныя комплексы. Але не за свае грошы, а за кошт згаданых абавязкаў Расеі”.

Раман Якаўлеўскі кажа: тут гаворка ідзе пра дзясяткі мільёнаў даляраў. Экспэрт мяркуе, што гэтае пытаньне складанае, бо ў Расеі пакуль не хапае грошай на новыя комплексы нават для сваёй арміі. Адметна, што абодва міністры абароны сёньня, адказваючы на пытаньні журналістаў, абмінулі гэтую праблему.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG