Аб гэтым Свабодзе паведаміў адвакат Мікалая Аўтуховіча Павал Сапелка. Па якіх канкрэтна эпізодах прад’яўленае абвінавачаньне, адвакат адмовіўся паведаміць, спаслаўшыся на тое, што даў падпіску аб неразгалошваньні.
Ад 3 да 10 гадоў турмы пагражае іншым арыштаваным прадпрымальнікам Юрыю Лявонаву і Ўладзімеру Асіпенку. Ім прад'яўлена абвінавачаньне па частцы 2 артыкулу 218 Крымінальнага кодэксу, паведамляе Інтэрфакс.
8 лютага ў Ваўкавыску супрацоўнікі Галоўнага ўпраўленьня па барацьбе з арганізаванай злачыннасьцю МУС разам з байцамі спэцпадразьдзяленьня па барацьбе з тэрарызмам “Алмаз” арыштавалі Мікалая Аўтуховіча, Юрыя Лявонава й Уладзімера Асіпенку. У іхных кватэрах адбыліся ператрусы, пасьля чаго ўсіх трох адвезьлі ў менскае СІЗА.
Паводле інфармацыі МУС, затрыманыя падазраюцца ў арганізацыі і зьдзяйсьненьні шэрагу цяжкіх злачынстваў. У прыватнасьці, было паведамлена пра падпалы і падрывы маёмасьці дзяржаўных службоўцаў. Такім чынам яны нібыта помсьцілі за перасьлед іхнай фірмы. Пазьней Першы канал БТ паведаміў, што пры ператрусах у затрыманых была знойдзена выбухоўка і агнястрэльная зброя.