Лінкі ўнівэрсальнага доступу

Марш прадпрымальнікаў: з рэгіёнаў — на Бангалор


У сёньняшняй акцыі пратэсту прадпрымальнікаў у Менску ўдзельнічалі і дэлегацыі з рэгіёнаў. Некаторым зь іх давялося дабірацца ў сталіцу нават празь міліцэйскія кардоны.

У Сьветлагорску раніцай міліцыя ня выпусьціла ў Менск два аўтобусы, замоўленыя прадпрымальнікамі. Пра гэта паведаміў старшыня каардынацыйнай рады індывідуальных прадпрымальнікаў краіны Анатоль Зьмітровіч:


Міліцыянты запалохалі вадзіцеляў,
каб тыя ня везьлі прадпрымальнікаў у Менск

Анатоль Зьмітровіч: “Аўтобус ня выехаў ні адзін, ні другі, бо ДАІ забараніла выяжджаць. Міліцыянты запалохалі вадзіцеляў, якія зьбіраліся везьці прадпрымальнікаў на марш.
Мы хадзілі натоўпам у міліцыю, высьвятлялі, што да чаго. Але ніхто нас ня выслухаў
Мы хадзілі натоўпам у міліцыю, высьвятлялі, што да чаго. Але ніхто нас ня выслухаў.

Тым ня менш прадпрымальнікі знайшлі выйсьце. Усе, хто зьбіраўся, выправіліся ў Менск. І я таксама“.

Нягледзячы на спыненьні ў дарозе, на марш у Менск дабраліся прадпрымальнікі зь Берасьцейшчыны, Віцебску, Полацку і Наваполацку, Мазыра, Слуцку, Барысава.


“Гэта праблемы 200 тысяч прадпрымальнікаў”

Лідэр грамадзкага аб’яднаньня “За свабоднае разьвіцьцё прадпрымальніцтва” Віктар Гарбачоў: “Гэта праблема не адной арганізацыі. Гэта праблема 200 тысяч прадпрымальнікаў. Адпаведна, трэба змагацца за справу разам. І варта не аддзяляць праблемы эканомікі ад палітыкі. Усе мы цудоўна разумеем, што цяперашні ўрад Беларусі не выконвае свае абавязкі ў дачыненьні да прадпрымальнікаў”.

На шэсьці ў Менску прадпрымальнікі з рэгіёнаў ішлі пад лёзунгамі “Свабоду прадпрымальніцтву!”, “Працу!”

Прадпрымальніца з Давыдаўскага рынку ў Гомелі Ірына Коваль: “Я цяпер у перадынфарктным стане: я ўдава, адна гадую дзяцей. Куды я пайду з рынку? Мне пяцьдзясят гадоў, мяне ўжо нікуды ня возьмуць. Мы нічога ня просім у дзяржавы — ні капейкі, ні бальнічнага лістка. Мы ёй плацім падаткі. Мы нават давалі працоўныя месцы іншым”.


“Няхай Лукашэнка дасьць нам новыя працоўныя месцы!”

Многія дробныя гандляры лічаць так: калі ўлады вырашылі зьліквідаваць дробных гандляроў на рынках, то няхай спачатку забясьпечаць іх працоўнымі месцамі на прадпрыемствах.
Няхай Лукашэнка дасьць нам працоўныя месцы. І мы кінем гэты хлеб і пойдзем працаваць на заводы.


Гомельская прадпрымальніца: “Няхай Лукашэнка дасьць нам працоўныя месцы. І мы кінем гэты хлеб і пойдзем працаваць на заводы”.

Сёньня ў Магілёве прадпрымальнікі, якія ня трапілі на пратэст у Менску, зьбіралася на рынку ў мікрараёне Саломенка. Гэты рынак улады зьбіраюцца ліквідаваць, а на ягоным месцы збудаваць спарткомплекс. Гандляры — супраць гэтага і зьбіраліся правесьці мясцовы рэфэрэндум. Чыноўнікі адмовілі і ў гэтым.

“Нашы магілёўскія чыноўнікі папросту не прыслухоўваюцца да думкі народу. Да думкі тых людзей, якія плацяць ім заробкі і ўтрымліваюць іх. Таму я лічу, што гэта вялізная непавага да людзей”, — гэтак пракамэнтаваў рашэньне гарвыканкаму жыхар мікрараёну, былы кандыдат у дэпутаты Ігар Каваленка.


Пад сваім пратэстам прадпрымальнікі сабралі 6 тысяч подпісаў

Супраць зносу рынку прадпрымальнікі сабралі шэсьць тысяч подпісаў жыхароў мікрараёну.

Сёньня прадпрымальнікі наведалі памочніка прэзыдэнта, галоўнага інспэктара па Магілёўскай вобласьці Генадзя Лаўранкова. Чыноўнік выслухаў меркаваньні гандляроў і даў свой адказ.

“Ён сказаў, што ёсьць фінансаваньне пад спарткомплекс і мы павінны пераехаць. Але мы будзем пераяжджаць толькі тады, калі будзе падрыхтаваная пляцоўка на сто працэнтаў”, — заявіла адна з прадпрымальніц.


Мілінкевіч: “Мы мусім працаваць з прадпрымальнікамі”

Па выніках акцый пратэсту прадпрымальнікаў лідэр стваранага руху “За свабоду” Аляксандар Мілінкевіч заявіў:

“Я лічу, што палітыкі павінны быць актыўнымі, таму што вырашаецца лёс вялікай групы людзей — людзей актыўных, прадпрымальных. Звычайна ў грамадзтве гэта людзі вельмі каштоўныя. Мы ня можам стаяць збоку й казаць: “Вырашайце самі свае праблемы”.

Я сам хадзіў у Менску ва Ўруччы па рынку, сустракаўся зь людзьмі. Мы распаўсюджвалі бюлетэні, тлумачылі сытуацыю й заклікалі людзей удзельнічаць у сёньняшняй мірнай, дазволенай акцыі. Бо калі самому не бараніць сябе, то ніхто цябе таксама бараніць ня будзе”.

Глядзець камэнтары (4)

Гэтая дыскусія закрытая.

Вам можа яшчэ спадабацца

XS
SM
MD
LG