Лінкі ўнівэрсальнага доступу

“У 2009 годзе газ для Беларусі можа каштаваць 203$”


Агляд незалежнага друку за 31 сакавіка.


Тэма нумару тыднёвіка “БелГазета” – затрыманьні і зьбіцьцё ўдзельнікаў сьвяткаваньня 90-угодкаў Беларускай Народнай Рэспублікі, а таксама ператрусы ў офісах і на кватэрах незалежных журналістаў. Паведамляе намесьнік рэдактара Віктар Марціновіч:

Выходзіць інтэрвію з Андрэем Лянкевічам, які распавядае пра тое, што зь ім здарылася. Таксама інтэрвію зь Міколам Статкевічам, якому мы задаём пытаньні, чаму не было абвешчанае дадатковае месца збору, чаму ў шэрагах мітынгоўцаў была лёгкая паніка. У якасьці запрошанага экспэрта ў нас выказваецца Райнэр Лінднэр – нямецкі палітоляг. Ён адказвае на пытаньне, ці падрыхтаваны Эўразьвяз да таго, каб далучыцца да санкцыяў ЗША. У кантэксьце тых падзеяў, якія адбываліся ўвесь тыдзень у Беларусі і на вуліцах, і з журналістамі. У тым ліку тымі, якія зьяўляюцца прадстаўнікамі мэдыяў, што фінансуюцца з Эўропы”.

Яшчэ адна тэма ў сёньняшнім нумары выданьня – гатовасьць расейскага “Газпрому” падвысіць кошт газу для Беларусі. “Каб гэтага не адбылося ў Беларусі застаецца два шляхі: увайсьці ў канфэдэрацыю з Расеяй альбо разьмясьціць на сваёй тэрыторыі ядзерную зброю” -- паведамляе “БелГазета”.

Тэма падвышэньня кошту расейскага газу для Беларусі – адна з асноўных і ў сёньняшнім нумары газэты “Беларусы і Рынак”. Гаворыць журналістка Тацьцяна Манёнак:

На 1 студзеня 2009 года кошт газу для Беларусі можа дасягнуць 203 даляраў. Гэта паводле папярэдніх падлікаў. Беларускі бок гэтага не чакаў і з гэтай сытуацыі цяжка будзе выйсьці. Больш таго, яны называюць такое становішча катастрафічным. Расейскія дэпутаты кажуць, што выйсьце для Беларусі ёсьць – гэта інтэграцыя. Гэта дасьць магчымасьць супрацоўнічаць у ваеннай сфэры, разьмясьціць тут ядзерную зброю і гэтак далей. Гэткім чынам, газ ізноў стаў разьменнай манэтай у палітычным гандлі паміж Беларусьсю і Расеяй”.

“Беларусы і Рынак” таксама шукае адказу на пытаньне, чаму дзеяньні ўлады былі найбольш жорсткімі менавіта ў дзень сьвяткаваньня 90-угодкаў БНР. А таксама якую мэту мела гісторыя з ператрусамі ў офісах і кватэрах незалежных журналістаў. Сваімі меркаваньнямі на гэтую тэму дзеляцца удзельнікі падзей, палітыкі, палітолягі, праваабаронцы.

Незалежнае выданьне “Ганцавіцкі час” паведамляе пра вынікі дасьледаваньня на тэму -- якія прадукты харчаваньня і ў якой колькасьці можна правозіць праз мяжу. З гэткім пытаньнем у газэту зьвярнуўся мясцовы жыхар, у якога памежнікі сканфіскавалі паўтара кіляграмы сасісак, паведамляе рэдактар выданьня Пятро Гузаеўскі:

“Я пачаў тэлефанаваць, пачынаючы з памежнага камітэту. Там мяне пераадрасоўвалі да тае пары, пакуль мне гэта не надакучыла. Тады я патэлефанаваў на берасьцейскую мытню і там мне паведамілі, што няма такой забароны. Да пяці кіляграмаў харчовых прадуктаў можна правозіць. А гэта нейкая самаўпраўства. Дык гэты чалавек сказаў, што калі наступны раз паедзе, то абавязкова напіша мытнікам скаргу”.


Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG