Лінкі ўнівэрсальнага доступу

“Куба лібрэ” значыць, што мы жадаем свабоднай Кубы” <img src="/img/icon-photogallary.gif" border=0 />


Сёньня ў Горадні ў памяшканьні ТБШ адбыўся паказ дакумэнтальнага фільму “Куба лібрэ” (“Свабодная Куба”).


Такім чынам, Горадня ўзяла ўдзел у сусьветным кінафэсьце “Адзін сьвет-2008”, што прысьвечаны правам чалавека. Арганізавалі паказ прадстаўнікі незарэгістраванага Руху “За свабоду”.

На паказе прысутнічаў кіраўнік чэскай амбасады зь Менску Ўладзімір Румл.

Карэспандэнт: “Я прыйшоў на фэст дакумэнтальнага кіно і адразу ўбачыў людзей з пагонамі, і нават бачу галоўнага ідэёляга гораду Сяргея Дубаўца. Добры дзень! Вы прыйшлі забараніць, ці не? А, удзельнічаць?”

Пажарная служба гаворыць, што трэба дадатковыя вогнетушыцелі.

Пажарнік: “Значыцца, павінен быць хоць адзін дзесяцілітровы…”

“Адзін маю, калі трэба два тады знойдзем…”, гаворыць кіраўніца ТБШ Тацяна Канопкіна.

Канопкіна: “Ну вось дзе гэта напісана? Калі я зьбіраю сябраў сваёй арганізацыі і мы робім прагляд, гэта забаронена ці не?”

Пажарнік: “Прагляд усіх фільмаў у кінатэатры ў нас”.

Канопкіна: “Такіх фільмаў вы ў кінатэатры ня ўбачыце”.

Кінасэанс “Куба лібрэ” прыцягнуў увагу гісторыка і журналіста Ўладзімера Хільмановіча.

Карэспандэнт: “У цябе ўзьнікаюць асацыяцыі, пытаньні, чаму менавіта зь фільма з такой назвай пачалі?”

Хільмановіч: “Безумоўна, асацыяцыі паміж Беларусьсю і Кубай увесь час узьнікаюць, але, зь іншага боку, заўсёды ёсьць перакананьне, што нашая сытуацыя недэмакратычнага дзяржаўнага кіраўніцтва ня будзе такой працяглай, як на Кубе. Мы жывем не на высьпе, і я перакананы папросту, што беларусам не наканаваны такі лёс, як кубінцам. Тым ня менш, беларусам гэта – добры напамінак пра тое, што дыктатура можа трываць досыць доўга, і гэта добры ўрок Кубы для ўсіх краінаў”.

На кінапаказ у Горадню прыехаў кіраўнік Чэскай амбасады зь Менску Уладзімір Румл.

Карэспандэнт: “Сп.Румл, я стаў шукаць у інтэрнэце, што гэта — “Куба лібрэ”, але не знайшоў рэцэпту, а вы ведаеце, што гэта за напой “Куба лібрэ”?

Румл: “Я дакладна таксама ня ведаю, але я думаю, што гэта будзе які-небудзь кактэйль, зроблены з кубінскага рому і, думаю, нядрэнны. Я таксама думаю, што гэты фільм будзе добры, якасны і мы атрымаем добрую інфармацыю, што адбываецца на Кубе сёньня”.

Чэскі амбасадар Уладзімір Румл і арганізатар паказу Павал Мажэйка


Арганізатарам паказу зьяўляецца рух “За свабоду”, адзін з прадстаўнікоў якога — Павал Мажэйка.

Карэспандэнт: “Вас не заінтрыгавала, што гэта за напой “Куба лібрэ”, які нібыта шырока распаўсюджаны на Кубе?”

Мажэйка: “Мы, калі абралі менавіта гэты фільм, нас цікавіла перш за ўсё тая гісторыя, той вынік, да якога прывяла рэвалюцыя Фідэля Кастра: Куба застаецца таталітарнай краінай, якая мае праблемы з правамі чалавека. Нам гэта было важна, а не напой. Хутчэй за ўсё, яго стварылі турысты, левацкая прэса, якая шукала ў Кубе сваіх юнацкіх мараў пра перамогу сацыялізму”.

Карэспандэнт: “Чэ Гэвара, Фідэль?”

Мажэйка: “Так, безумоўна”.

Чэскі амбасадар Уладзімір Румл сказаў уступнае слова да кінафільма пра Кубу. У прыватнасьці, ён зазначыў наступнае:

Румл: “Рэжысэр, нягледзячы на рызыку перасьледу, зьняў карціну пра сучасную кубінскую дыктатуру, у якой паказаў рэальнасьць, схаваную за рамантычнымі уяўленьнямі турыстаў”.

Не зважаючы на пажарнікаў, кінасэанс распачаўся, і Павал Мажэйка ўбачыў, што паказваюць якраз “Куба лібрэ”...

Мажэйка: “Гэты напой – проста ром з колай. Калі ў бары замаўлялі “Куба лібрэ”, гэта азначала — мы жадаем вам, каб Куба была свабоднай, мы жадаем свабоднай Кубы”.

Павал Мажэйка паказаў сёньня чэскаму амбасадару Ўладзіміру Румлу Стары горад, Каложу, замкі. Паводле Паўла, за імі ўвесь час хадзіў чалавек у цывільным, што рабіў апэратыўную відэаздымку. Нават у карчме, куды яны зайшлі пад’есьці, на стале ўжо стаяла торбачка з вочкам аб’ектыву.

Павал Мажэйка таксама сказаў, што чэскі госьць хацеў пакаштаваць якой-небудзь адметнай беларускай гарадзенскай стравы, але такой яны не знайшлі.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG