Прэзыдэнт Казахстана Нурсултан Назарбаеў падпісаў пратакол аб далучэньні краіны да Ўсясьветнай гандлёвай арганізацыі, паведамляе прэзыдэнцкая прэс-служба.
Генэральная рада Ўсясьветнай гандлёвай арганізацыі ў сваёй штаб-кватэры ў Жэнэве зацьвердзіла праект рашэньня пра далучэньне Казахстана да УГА.
Працэс уступленьня Казахстана ў УГА доўжыўся 20 гадоў — краіна падала заяўку на ўступленьне ў арганізацыю ў 1996 годзе. Як падкрэсьліў Назарбаеў, за час перамоваў канфігурацыя казахстанскай эканомікі значна зьмянілася:
«Яна стала больш моцнай і адкрытай. ВУП на душу насельніцтва павялічыўся ў 18 разоў і дасягнуў узроўню краін Цэнтральнай і Ўсходняй Эўропы. Аб’ём зьнешняга гандлю дасягнуў 120 мільярдаў даляраў. Больш за 90% нашага зьнешнегандлёвага абароту прыпадае на краіны — сябры УГА. Значна пашырылася геаграфія гандлёвых адносін. Калі ў сярэдзіне 90-х гадоў Казахстан меў гандлёвыя сувязі толькі з краінамі постсавецкай прасторы, то сёньня мы гандлюем са 185 дзяржавамі свету», — сказаў прэзыдэнт Казахстана.
Казахстан стаў 162-м сябрам Усясьветнай гандлёвай арганізацыі.
Расея ўступіла ва Ўсясьветную гандлёвую арганізацыю ў жніўні 2012 году.
Беларусь падала заяўку на ўступленьне ў арганізацыю яшчэ ў 1993 годзе, аднак працэс быў фактычна замарожаны. Хаця МЗС Беларусі сьцьвярджае, што перамоўны працэс па далучэньні краіны да Ўсясьветнай гандлёвай арганізацыі працягваецца.