Малодшы сын Аляксандра Лукашэнкі Мікалай 13 сьнежня ўзяў удзел у аматарскай хакейнай гульні каманды «Грыфоны» супраць «Мядзьведзяў» на менскай «Чыжоўка-арэне». За дзьве хвіліны да канца гульні адбылася бойка, у якой мог узяць удзел 13-гадовы Мікалай, піша Tut.by.
Пад канец гульні трэнэр «Грыфонаў» зьняў брамніка і выпусьціў на лёд шостага хакеіста – праз гэта ціск на вароты каманды ўзмацніўся, і ў выніку завязалася бойка.
Спачатку судзьдзя-інфарматар абвясьціў, што за грубасьць дысцыплінарным штрафам пакаралі «мядзьведзя» Івана Ліхтаровіча і «грыфона» Мікалая Лукашэнку, але затым «паправіўся»: не Лукашэнку, а Таболіна (імя не называецца). Бойку хутка разьнялі судзьдзі.
Пасьля гульні «Мядзьведзі» заявілі Tut.by, што завадатарам бойкі быў Таболін, але Лукашэнка ў ёй ня ўдзельнічаў: «бойка з Лукашэнкам амаль адбылася, але Саня [Галавач] чагосьці забаяўся – „напхаў“ партнэру Іван Ліхтаровіч».
Мікалай Лукашэнка (справа)
Да гульні Ліхтаровіч казаў: «Мікалай – спакойны чалавек. Але раптам… Пры парадзе на нэрвах можа здарыцца эпічная бойка! Гэта дадасьць відовішча матчу».
Урэшце каманда Мікалая Лукашэнкі перамагла ў адборачным турніры да фіналу «Залатой шайбы», а самога Лукашэнку прызналі найлепшым нападнікам.